Florian Kamberi është një nga lojtarët që ka pranuar të luajë për kombëtaren shqiptare.

Sulmuesi 24-vjeçar që aktivizohet me skuadrën e Hibernian ka bindur trajnerin Edi Reja me aftësitë e tij dhe është italiani që e ka kërkuar me ngulm t’i bashkohet kuqezinjve.

Megjithatë s’ka qenë e lehtë, pasi edhe Zvicra kërkonte shërbimet e tij. Mediet skoceze, konkretisht “edinburghlive.co.uk”, raporton se ka qenë ndihmësi i 73-vjeçarit, Sergio Porrini që ka bindur Kamberin t’i thotë “Po” Shqipërisë.

Ai ka qenë i pranishëm në ndeshjen Hibernian – Celtic ku sulmuesi shqiptar arriti të shënonte në humbjen 2-5. Bëhet me dije se pas takimit, Sergio Porrini ka biseduar me 24-vjeçarin duke i treguar planet e Rejës dhe rinovimin që po i bëhet ekipit kombëtar.

Projekti i paraqitur nga ndihmësi i trajnerit të Shqipërisë duket se ka bindur Kamberin, i cili në majën e sulmit ka treguar se është pikërisht “vrasësi” që mund t’i bëjë shumë punë ekipit tonë kombëtar.