Skuadra e AC Milan ka arritur mbrëmë një fitore të vonshme, por shumë të rëndësishme për të mbetur pjesë e garës për titullin e Serie A-së, shkruan Reporteri.net. 

Milan është përballur me Lazion, ndaj të cilët triumfoi me rezultat përfundimtar 1-2.

Ndeshja ishte luajtur në Stadio Olimpico, Romë, derisa për golin e vonë dhe të fitores për Milan e shënoi Sandro Tonali në minutën e 92-të.

Ndërkaq, veç golit të Tonalit, i cili ishte mjaft i rëndësishëm për të mbajtur Milanin të gjallë në kampionat, asisti i Zlatan Ibrahimovic ishte me shumë peshë.

Jo vetëm për faktin se nga asisti i tij përfitoi Tonali, për t’i sjellur një fitore madhështore kuqezinjve, por edhe për atë se ky u regjistrua si asisti më i vjetër në Serie A.

Kësisoji, ylli suedez ka kaluar edhe legjendën e Romës, Francesco Tottin, i cili ishte 40 vjeç, 4 muaj si dhe 23 ditë, kur kishte dhuruar asist për Radja Nainggolan, në fitoren e thellë të Romës ndaj Torinos, me rezultat përfundimtar 4-1.

Vlen të theksohet se Ibrahimovic aktualisht është 40 vjeç, 6 muaj dhe 21 ditë.