Partitë kryesore, gjegjësit kandidatët për kryeministër të vendit edhe ditën e tetë të fushatëz zgjedhore kanë bërë premtime nga më të ndryshmet.

Ngritje e cilësisë në arsim, promovim të talentëve, përmirësim të drejtave të punëtorëve, luftim korrupsionit e krimit janë veç disa nga premtimet e tyre.

Kandidati i PDK-së për kryeministër, Kadri Veseli, ka premtuar rritje të cilësisë në arsim.

“Si Kryeministër do të kem kujdes të veçantë për rritjen e cilësisë në arsim, duke shtuar fondet shtetërore dhe përmirësuar infrastrukturën shkollore dhe universitare”, ka deklaruar ai.

Kurse në Rahovec ka deklaruar se zhvillimi i bujqësisë është prioritet absolut i tij dhe PDK-së.

“Të gjithë prodhuesve do ua subvencionojmë interesin e kredive për prodhim deri në 80 për qind dhe do ta jetësojmë edhe sigurimin e prodhimeve bujqësore”, ka premtuar ai, shkruan Reporteri.net.

Kurse i nominuari për kryeministër nga koalicioni AAK-PSD, Ramush Haradinaj gjatë një drekë pune me përfaqësuesit e federatave të sportit në vend është zotuar që Kosovën do ta shpall shtet të sportit, duke investuar në përmbylljen e infrastrukturës së nevojshme, stadiume, palestra sportive, shkolla të sportit dhe në promovimin e stimulimin e talentëve.

“Qeveria Haradinaj 3, do të bëhet promovuese e denjë e talentëve tanë!”, ka shkruari Hardinaj në Facebook pas takimit me sportistët.

Kandidati i Lëvizjes Vetëvendosje për kryeministër, Albin Kurti,nga Prizreni ka premtuar se do të përmirësojë të drejtat e punëtorëve.

“Unë zotohem para jush se siguria në punë, të drejtat e punëtorëve dhe dinjiteti i tyre do të jenë prioritet i qeverisë së Vetëvendosje-s pas 6 tetorit”, ka deklaruar Kurti.

Kurse kandidatja e LDK-së për kryeministre, Vjosa Osmani gjatë ditës së djeshme nga tubimi në Kodrën e Trimave ka thënë se do ta luftojë krimin dhe korrupsionin.

Kandidati për kryeministër nga koalicioni NISMA-AKR-PSD nuk ka bërë ndonjë premtim të veçantë gjatë ditës së djeshme. /Reporteri.net/.