Ministrja e Arsimit e Shqipërisë, Besa Shahini, ka njoftuar se mësimi është pezulluar edhe për ditën e nesërme.

“Kemi vendosur që të pezullojmë mësimin në të gjitha shkollat, kopshtet dhe çerdhet e vendit (përfshirë privatin) edhe ditën e nesërme (datë 27 Nëntor, 2019) në mënyrë që familjet të qëndrojnë së bashku dhe ta përballojnë situatën duke u solidarizuar me ata që u prekën më së shumti nga kjo tragjedi”, njoftoi ajo përmes rrjetit social Facebook.

Shahini deklaroi se është e tronditur nga humbja e jetëve dhe lëndimet trupore që kanë pësuar qytetarët si pasojë e tërmetit.

“Bëj me dije se ekipet tona po vijojnë ndërkohë me evidentimin e dëmeve materiale dhe hartimin e planit të masave për shkollat e dëmtuara”, vijoi Shahini, teksa ngushëlloi të gjitha familjet që kanë humbur njerëzit e tyre të dashur si dhe uroi shërim sa më të shpejtë të gjithë të lënduarve.