Anëtari i Lëvizjes Vetëvendosje, Boiken Abazi, Presidentin Thaçi e liderin e LDK-së, Isa Mustafa, i ka quajtur vampirë politik të cilët mbijetojnë duke pirë gjakë.

Ky reagim i Boiken Abazit ka ardhur pasi gjatë ditës së djeshme Thaçi kishte paralajmëruar për një formim të mundshëm të një Qeverie të re e cila është e gatshme të iu shërbej qytetarëve dhe ta luftoj coronavirusin, shkruan Repoteri.net

Sipas Abazit, Thaçi e Mustafa kanë vdekur politikisht e për të ekzistuar ata dhunojnë kushtetutë e kundërshtarë politikë

Reagimi i plotë:

Thaçi e Mustafa janë specie politike të ngjashëm me vampirët. Si vampirët që u krijuan në mesjetë, Thaçi e Mustafa janë përfaqësues të një regjimi të vjetër që duan të rivendosin në Kosovë neofeudalizmin, rendin e ri mesjetar që problemet i zgjidh përmes dhunës e grabitjes së të tjerëve dhe ndarjes së plaçkës mes klaneve të tyre. Si vampirët që kanë vdekur por ekzistojnë vetëm duke i pirë gjakun të gjallëve, Thaçi e Mustafa kanë vdekur politikisht e për të ekzistuar ata dhunojnë kushtetutë e kundërshtarë politikë, dhe tentojnë t’i nënshtrojnë qytetarët si skllevër të tyre. Thaçi e Mustafa, bashkë me klanet që i rrethojnë, politikisht nuk mund të ekzistojnë përveç se si gjakpirës. I është shtuar shumë etja këtë kohë e janë ligështuar se qeveria e re ka qenë si hudhra për vampirët. Zgjedhjet e radhës janë goditja në zemër për ta, që i jep fund ekzistencës së tyre. Para se të marrin goditjen e fundit, dhe nga që e dinë se nuk kanë shpëtim prej saj, ata po orkestrojnë betejën e tyre finale, grusht shtetin që synon gjunjëzimin e qytetarëve dhe prerjen gjakatare të trupit të Kosovës ku duan të shuajnë etjen e tyre. Por nuk e duron më ky popull natën mesjetare ku sundojnë vampirët. Në këtë betejë finale dita, dija e drita do fitojnë mbi errësirën.