Dy vitet e kaluara, Komuna e Rahovecit ka qenë një ndër komunat që ka mbjellur më së shumti drunj, ani pse është një komunë relativisht e vogël.

Edhe këtë vit, Rahoveci ka dhënë një leksion të tillë, duke u bërë komuna e parë që mbjell drunj në pranverën e sivjetme, shkruan Reporteri.net.

Drejtori për Urbanizëm, Planifikim dhe Mbrojtje të Mjedisit, Rumir Zhuniqi, ka thënë se po mbjellen 10 mijë trupa drunjsh në këtë qytet.

“Një projekt serioz që do t’ia ndryshojë pamjen për të mirë komunës së Rahovecit, ka nisur sot. Komuna e Rahovecit, përkatësisht Drejtoria për Urbanizëm, Planifikim dhe Mbrojtje të Mjedisit, ka nisur së zbatuari projektin për mbjelljen e drunjve të llojëve të ndryshme, si Rrap, Bli, Catalpa etj, sipas së cilit parashihet mbjellja e mbi 10 mijë drunjve në tërë territorin e komunës sonë”, ka thënë ai.

Drejtori ka bërë të ditur se kompania që po kryen mbjelljet, e ka për detyrë edhe të ujis drunjtë deri në muajin shtator./Reporteri.net