“Francezët do të kenë mundësi të shkojnë me pushime në muajt korrik dhe gusht, pavarësisht pandemisë së coronavirus” kështu u shpreh të enjten kryeministri i Francës Edouard Philippe teksa shtoi se do të ketë disa kufizime lokale, në varësi të zhvillimeve të virusit.

Qytetarët e Francës do të mund të rezervojnë pushimet e tyre pasi industria e turizmit ka premtuar se ata do të rimbursohen, nëse situata përkeqësohet.

Kryeministri Philippe prezantoi një fond masiv prej 18 miliardë eurosh për sektorin e turizmit. “Është e paprecedentë, masive dhe e nevojshme”, u shpreh kryeministri.

“Turizmi po përjeton situatën më të keqe në historinë moderne, ndërkohë që ky sektor është ndër thesaret e ekonomisë franceze”, tha Philippe. “Ndaj mbrojtja e tij është një prioritet kombëtar”.

Hotelet, restorantet dhe agjencitë turistike në Francë qëndrojnë të mbyllura që nga mesi i marsit por deri më tani kanë marrë 6.2 miliardë euro në ndihma shtetërore dhe kredi.