Partia Social Demokrate e Kosovës ka zhvilluar një aksion para selisë së EULEX-it në Fushë Kosovë, lidhur me arrestimet e fundit nga Specialja të krerëve të UÇK-së, asistuar nga policia e EULEX-it.

Përmes një aksioni simbolik kjo parti ka vendosur një dry dhe zinxhirët tek dyert e objektit të EULEX-it me mbishkrimin “E skaduar” që ka të bëjë me mandatin e këtij misioni, shkruan Reporteri.

Pas këtij aksioni ka reaguar kryetari i PSD-së, Dardan Molliqaj, i cili thotë se Gjykata Speciale po kryen arrestime dhe po mban njerëz në paraburgim jashtë mandatit të saj kushtetues rrjedhimisht në kundërshtim me Kushtetutën e Kosovës.

Postimi i tij:

Sot, së bashku me aktivistët e PSD-së, e mbyllëm Gjykatën Speciale.

Gjykata Speciale po kryen arrestime dhe po mban njerëz në paraburgim jashtë mandatit të saj kushtetues rrjedhimisht në kundërshtim me Kushtetutën e Kosovës. Nga një gjykatë paralele prej sistemit të drejtësisë së Kosovës nuk mund të vie drejtësia por vetëm ndryshimi i të vërtetës së luftës çlirimtare të UÇK-së.

Kosovës i nevojitet vendosja e drejtësisë prej institucioneve të saj prandaj kjo gjykatë duhet të shkoj.

https://www.facebook.com/dardanmolliqaj2/posts/3608665532488655