Paqartësi rreth formatit të takimit të kësaj jave në Bruksel, SHBA insistojnë se Escobar do të jetë aty, BE thonë se veç palët me Lajçakun

Lajme

Paqartësi rreth formatit të takimit të kësaj jave në Bruksel, SHBA insistojnë se Escobar do të jetë aty, BE thonë se veç palët me Lajçakun

Reporteri

28 Shtator 2021 | 11:09

Pas tensioneve të ngritura pas vendosjes së reciprocitetit në targa, në Bruksel, pala kosovare dhe ajo serbe këtë javë pritet të mbajnë takim dialogu.

Në takimin që është paralajmëruar të mbahet nesër, janë krijuar paqartësi nëse aty do të jetë prezent edhe Zëvendës Ndihmës Sekretari i Departamentit të Shtetit për Çështjet Evropiane dhe Euroaziatike, Gabriel Escobar, shkruan Reporteri.net.

BE-ja ka mohuar se Escobar do të jetë pjesë e takimit.

Lexo edhe:

Arrestohen 15 veta në Mitrovicë, po planifikonin një përleshje mes dy grupeve

Reagon “Germin”, organizata që u përmend nga Prokuroria në aktakuzën ndaj Ministrit Damka si përfituese “në keqpërdorimin 1 milionësh”

Aktakuza ndaj Damkës, PDK kërkon të hetohet përfshirja e Donika Gërvallës dhe Liza Gashit

Zëdhënësi i BE-së, Peter Stano, ka konfirmuar se takimi do të mbahet nesër, por ai ka mohuar se zv.ndihmësi i Sekretarit të Shtetit, Gabriel Escobar do të jetë prezent në takim.

“Jo, z.Escobar nuk do të jetë prezent në dialog. Dialogu ka 3 pjesëmarrës (Kosovën, Serbinë dhe BE’në). Të gjithë të tjerët vetëm e mbështesin atë (dialogun) nga jashtë”, ka thënë Stano.

Mirëpo, ndryshe kanë deklaruar gjatë ditës së djeshme nga Ambasada Amerikane në Prishtinë.

Në një përgjigje për Gazetën Online Reporteri.net, Ambasada Amerikane në Prishtinë ka bërë të ditur se përfaqësuesit e Prishtinës dhe Beogradit janë dakorduar për t’u takuar këtë javë në Bruksel, derisa kanë konfirmuar se Zëvendës Ndihmës Sekretari i Departamentit të Shtetit për Çështjet Evropiane dhe Euroaziatike, Gabriel Escobar, do të udhëtojë në Bruksel këtë javë për të marrë pjesë në këto diskutime.

“Ne jemi të kënaqur që Serbia dhe Kosova do të dërgojnë përfaqësues në Bruksel këtë javë për diskutime dhe inkurajojmë të dyja palët që të ri-angazhohen hapur, seriozisht dhe menjëherë. Zëvendës Ndihmës Sekretari i Departamentit të Shtetit për Çështjet Evropiane dhe Euroaziatike, Gabriel Escobar, do të udhëtojë në Bruksel këtë javë për të marrë pjesë në këto diskutime”, ka thënë zëdhënësi i Ambasadës Amerikane në Prishtinë për Gazetën Online Reporteri.net.

Situata në veri vazhdon të jetë e tensionuar, pas vendimit të Qeverisë së Kosovës që çdo automjet që hyn në Kosovë nga Serbia të ketë të vendosura targat e përkohshme.

Serbët për të kundërshtuar këtë vendim vendosën barrikada të shumta në rrugët që çojnë drejt pjesës kufitare në Bërnjak dhe Jarinje, duke i lënë të bllokuar këto dy pika kufitare tash e nëntë ditë. /Reporteri.net

Shpërndaje: