I dërguari evropian për bisedimet Kosovë-Serbi, Miroslav Lajçak, paralajmëroi të martën një takim ndërmjet kryenegociatorëve të të dyja palëve, për të diskutuar zbatimin e marrëveshjes për normalizimin e marrëdhënieve por edhe të përdorimit të dinarit serb, që çoi në mospajtime të thella ndërmjet autoriteteve në Prishtinë dhe diplomatëve perëndimorë.

Pas një takimi rreth dy orësh, Lajçak para mediaveka thënë se me Bislimin kanë diskutuar për zbatimin e Marrëveshjes Bazike dhe po ashtu për Rregulloren e re të BQK-së për pagesat me para të gatshme.

Emisari evropian tha do të thërrasë edhe një takim në Bruksel që do të jetë në nivel kryenegociatorësh, për për çka tha se ndërlidhet edhe vizita e tij në Kosovë, shkruan gazeta online Reporteri.net.

“Kemi diskutuar për normalizimin e marrëdhënieve. Dokumenti për normalizim, i cili është bërë një vit që kur e kemi adoptuar dhe duam të shohim përparim në këtë drejtim. Kjo është një nga çështjet për të cilën kemi diskutuar. Dhe çështja e dytë që është po ashtu e rëndësishme dhe për të cilën diskutuam është rregullorja e BQK-së për pagesat me para të gatshme.

Diskutuam edhe për çështjen e pagesave lidhur me aspektin monetar dhe që është pjesë relevante e procesit të dialogut. Për këtë çështje kemi pasur një takim edhe në Bruksel. Takimi në Burksel ishte konstruktiv dhe kemi pasur disa pyetje në të cilat jemi përgjigjur dhe kemi diskutuar por ka pasur edhe çështje që kanë tejkaluar kompetencat e delegacioneve në Bruksel dhe diskutuam këto çështje me Bislimin. Diskutimet do të vazhdojnë dhe kam në plan të realizojmë edhe një takim në Bruksel në nivel kryenegociatorësh. Kjo ishte edhe arsyeja pse erdha këtu.

Do të thosha se duhet analizuar disa përgjigje në lidhje me këtë çështje, por ky është një proces dhe duhet të jemi të sigurtë që në fund qytetarët, njerëzit të mos ndikohen nga një vendim i tillë. Në lidhje me këtë takim, i kam lënë të hapura mundësitë që të prezantojnë çështjet për të diskutuar, delegacionet që të vijnë dhe të diskutojnë dhe për mua kjo nuk është problem.

Ua kam lënë vendeve vet të vendosin se kë do të dërgojnë për të negociuar. Takimet e ardhshme janë në nivel të kryenegociatorëve”, tha Lajçak para gazetarëve.

Ai foli edhe për zbatimin e Marrëveshjes Bazike, teksa tha se është në interes të të dyja palëve që të ketë progres në këtë drejtim. Lajçak tha se Marrëveshja Bazë është marrëveshja më e mirë që mund të arrihej.

“Kemi diskutuar një listë të gjatë të çështjeve dhe më e rëndësishmja është zbatimi i marrëveshjes bazike, është në intere s të gjithëve të kemi progres në këtë drejtim. Kjo marrëveshje është marrëveshja më e mirë që kemi mundur të arrijmë. Nëse do të kishim një marrëveshje më të mirë do ta kishim bërë, prandaj është në interesin e secilit sepse në këtë marrëveshje i kemi të gjitha përgjigjet se çfarë të bëjmë dhe si të bëjmë dhe çështja është se kur do të ndodhë zbatimi. Kemi shpenzuar shumë kohë për të ndërmarrë hapat dhe ka një frikë te të dy palët se çfarë do të bëjë unë dhe çfarë do të bëjë pala tjetër. Besoj që këto çështje mund shumë thjeshtë të zgjidhen”, tha Lajçak në Prishtinë.

Paralajmërimet për takime të reja Kosovë-Serbi dhe normalizim marrëdhëniesh

Por ndryshe nga Lajçak,  zëvendëskryeministri Besnik Bislimi, tha se  “çështja e dinarit nuk është çështje për dialog”

Në njoftimin për media nga Kryeministria, u tha se Bislimi ka kërkuar nënshkrimin e Marrëveshjes Bazike me Serbinë, sekuencimin e zbatimit të saj si dhe heqjen e masave ndëshkuese ndaj Kosovës.

Sipas këtij njoftimi, sa i përket çështjes së dinarit, Bislimi ka thënë se ‘kjo nuk është çështje e dialogut’.

“Në takim u bisedua mbi ecjen tutje dhe avancimin në zbatimin e Marrëveshjes Bazike. Në lidhje me këtë, zëvendëskryeministri Bislimi ritheksoi se marrëveshja duhet të zbatohet përmes një plani të sekuencimit të drejtë, të barabartë e të balancuar mes palëve. Ai tha se nënshkrimi i marrëveshjes është garancë dhe për pranim e zbatim të saj. Në këtë drejtim, refuzimi nga Serbia dhe letra e kryeministres Brnabiq dhjetorin e kaluar, nuk kontribojnë pozitivisht në frymën e dialogut dhe zbatimin në plotni të marrëveshjes.

Ndërkohë, mbi masat ndëshkuese ndaj Kosovës, u kërkua nga ana e zëvendëskryeministrit Bislimi heqja e tyre sa më parë, ku shprehu se ato janë të padrejta dhe duhet të bëhen hapa finalizues drejt heqjes së tyre”, thuhet në njoftimin e Zyrës së Bislimit.

Sa i përket çështjes së dinarit, kjo Zyrë thotë se Bislimi ‘ka sqaruar se kjo çështje nuk është pjesë e dialogut’.

“Mbi Rregulloren e BQK-së, zëvendëskryeministri Bislimi sqaroi se kjo nuk është pjesë e procesit të dialogut dhe e njëjta nuk është subjekt i negociatave mes palëve. Poashtu, e siguroi z. Lajçak qё Qeveria ёshtё e interesuar tё sigurojё vazhdimёsinё e mbёshtetjes financiare tё Serbisё për serbët e Kosovës nё fushёn e edukimit, shёndetёsisё dhe mbrojtjes sociale”, u tha në njoftimin për media.

Për çështjen e dinari që ka shkaktuar plasaritje të raporteve me aleatët, foli dje edhe kryeministri Kurti. Kurti  është pyetur për kritikat dhe akuzat për prishjen e marrëdhënieve me aleatët.

Gjatë një adresimi për media shefi i ekzekutivit përgjigjur shkurt duke thënë se kjo “nuk është e vërtetë”, duke mos komentuar tutje, shkruan gazeta online Reporteri.net.

Zyrtarë të lartë amerikanë në ditët e fundit, kritikuan Qeverinë e Kosovës për mospërfilljen e kërkesës amerikane për shtyrje të vendimit për zbatim të rregullores së Bankës Qendrore të Kosovës.

Ata e cilësuan këtë si vendim të njëanshëm që mund të prodhojë pasoja edhe në partneritetin me SHBA-në. Kjo ka bërë që opozita në Kosovë të kritikojë Kurtin dhe qeverinë që ai drejton për prishje të marrëdhënieve me aleatët.

Ndihmëssekretari amerikan i Shtetit për Evropën dhe Euroazinë, James O’Brien, ditë më parë ka thënë se Shtetet e Bashkuara mund të mos e trajtojnë Kosovën si partnere, nëse ajo merr vendime pa u konsultuar me të, pas vendimit për ndalimin e dinarit.

Në një intervistë për Zërin e Amerikës, O’Brien tha: “Unë nuk bëj kërcënime të vagëta publikisht. Unë do të thosha, nëse ne nuk trajtohemi si partnerë, edhe ne nuk do ta trajtojmë qeverinë e Kosovës si partnere”.

Por, O’Brien tha të martën se Kosova duhet ta pezullojë vendimin e BQK-së menjëherë dhe të punojë si “shtet modern evropian” për gjetjen e një zgjidhjeje të “këtij problemi konkret”.

“Njerëzit duhet ta dinë se si do t’i paguajnë faturat. Kur lexoj deklaratën e Bankës Qendrore, aty nuk thotë se do ta lejohet përdorimi i dinarit. Thotë se do të ofrohet një alternativë. Kjo duhej bërë para se të zbatohej vendimi në bashkëpunim me komunitetet e prekura dhe me fqinjët që preken nga vendimi dhe sinqerisht me Bashkimin Evropian dhe me ne”, tha O’Brien.

Në linjë me këtë deklaratë të O’Brien, foli pak ditë më pas edhe ambasadori amerikan në Kosovë, Jeff Hovenier, i cili i është përgjigjur Qeverisë Kurti të cilët deklaruan se nuk ka rrezik për krisje të partneritetit me ShBA-në.

Hovenier theksoi sërish se kjo situatë ka prekur partneritetin e ShBA-së me Kosovën, duke përgënjeshtruar kështu Kurtin dhe vartësit e tij në Qeveri, që pas intervistës së bujshme të O’Brien.

“O’Brien e bëri të qartë se nëse Qeveria e Kosovës nuk na konsideron partnere, as ne nuk do ta konsiderojmë të tillë. Kam dëgjuar në intervista se kjo situatë nuk ka ndikuar në marrëdhëniet tona. Dua të jem i qartë, thjesht nuk është e vërtetë. Kjo situatë ka prekur partneritetin tonë. Çdo shpjegim tjetër është keqkuptim”, tha ambasadori amerikan. /Reporteri.net/

Kurti thotë se nuk është e vërtetë që Qeveria e tij është duke i prishur marrëdhëniet me aleatët