Autori i sulmit në Loznicë të Serbisë, ku mbeti i vrarë një polic serb dhe u plagos një tjetër, është likuiduar. Këtë e ka konfirmuar ministri i Brendshëm i Serbisë, Ivica Daçiq, raporton Gazeta Online Reporteri.net.

Mediat në Beograd raportojnë se i vrari është Faton Hajrizi, teksa kanë publikuar pamjet e rënda ku shihet kufoma.

Po ashtu, u publikuan edhe pamjet nga vendi ku raportohet se u vra Hajrizi.

“Pjesëtarët e policisë e likuiduan në afërsi të Loznicës”, citohet të ketë thënë Daçiq, siç raportojnë mediat serbe.

Autoritetet serbe sot e kanë shpallur në kërkim Faton Hajrizin, i cili dyshohej për vrasjen e policit Nikolla Krsmanoviq dhe plagosjen e një tjetri, në Loznicë të Serbisë.

Faton Hajrizi, dy javë më parë u arratis nga Burgu i Smrekonicës dhe ishte në kërkim nga Policia e Kosovës.

Kujtojmë se nga të shtënat që ndodhën natën e 18 korrikut në Loznicë, një polic u vra dhe një tjetër u plagos rëndë.

Sulmuesi fillimisht u identifikua si Artan Hajrizi, por i njëjti tha për mediat e Kosovës se nuk ka gisht në vrasje dhe se vëllai i tij, Fatoni ia ka vjedhur dokumentet personale.

Për rastin janë arrestuar edhe tre persona në Serbi. /Reporteri.net/

Daçiq: Autori i sulmit në Loznicë është vrarë

Mediat serbe publikojnë pamjet nga vendi i ngjarjes: Vritet Faton Hajrizi