Policia e Kosovës ka kërkuar ndihmën e qytetarëve për vendndodhjen e dy personave që dyshohen për vrasje në tentativë në fshatin Greme të Ferizajt, ku ka mbetur i plagosur një person, raporton Gazeta Online Reporteri.net.

Nëpërmjet një komunikate për media, Policia bën të ditur se persona e dyshuar janë dy vëllezërit Brikend dhe Blerand Zogaj.

Vëllezërit Zogaj ende ndodhen në arrati, teksa Policia ka marrë të gjitha veprimet e nevojshme hetimore që të lokalizojë vendndodhjen e tyre.

“Policia kërkon nga qytetarët që kushdo që ka ndonjë informacion rreth këtyre dy personave për vendndodhjen e tyre, të lajmërojnë stacionin më të afërt të, apo përmes aplikacionit digjital ‘’Lajmëro Policinë ‘’ dhe në numrat kujdetarë : 192 ,0290/326-250 & 0290/322-406 Të dhënat e juaja do të ruhen në konidencialitet të plotë”, thuhet në komunikatën e Policisë.

Ndryshe, më 27 gusht Policia njoftoi se një person po trajtohet në Qendrën Klinike Universitare të Kosovës, pasi i njëjti është plagosur me armë zjarri në fshatin Greme të Ferizajt.

Në raportin 24 orësh thuhej se të dyshuarit nuk janë identifikuar ende, teksa u bë e ditur që në vendin e ngjarjes, njësitë policore kanë gjetur dhe sekuestruar një gëzhojë që dyshohet të jetë e armës që u përdor në rast.

Plagoset një person në Ferizaj, të dyshuarit në arrati