Rezultatet e para të zgjedhjeve lokale në Stamboll tregojnë se kandidati i opozitës është rrugës drejtë fitores, me 53.6% ndërsa kandidati i partisë së Erdoganit ka marrë 45.4% të votave. Këto rezultate janë nga numërimi i afërsisht 95% të kutive të votimit.
Ekrem Imamoglu, nga Partia Popullore Republikane në bazë të rezultateve të 95% të kutive të votimit, është konfirmuar përsëri edhe për herë të dytë se është i zgjedhuri i qytetarëve të Stambollit. Imamoglu deri më tani ka siguruar 53.6% të votave.
Ndërsa kandidati i Partisë për Drejtësi dhe Zhvillim dhe ish-kryeministri turk, Binal Yildirim ka arritur të sigurojë 45.4% të votave, raporton CNN Turk.
Zgjedhjet në Stamboll u përsëritën, pasi që partia e Erdoganit, kandidati i së cilës kishte humbur zgjedhjet (Yildirim), dorëzoi ankesa në Këshillin e Suprem Zgjedhor për parregullsi në votim. Ky këshill morri vendim që votimi duhet të përsëritet.
Këto zgjedhje u konsideruan test për demokracinë turke dhe për Erdoganin, i cili më parë kishte thënë se ai që e udhëheq Stambollin e udhëheq Turqinë, për shkak se në këtë qytet banojnë rreth 20% e popullsisë turke.