Së paku 14 njerëz u vranë dhe mbi 800 u plagosën pasi forcat irakiane të sigurisë hapën zjarr kundër protestuesve në qytetin e shenjtë të Qerbelasë.
Iraku është përfshirë nga vala e dytë e protestave brenda një muaji, kundër qeverisë së kryeministrit Adel Abdul Mahdi, e cila akuzohet për korrupsion.
Protestuesit janë të zemëruar edhe me papunësinë e lartë dhe mungesën e shërbimeve themelore publike, përcjell Reporteri.net
Së paku 250 njerëz janë vrarë që nga fillimi i protestave në javën e parë të tetorit.
Këto protesta janë më vdekjeprurëset në Irak që nga viti 2017, kur Shteti Islamik është shpallur i mundur.
Protestat janë duke u parë si sfida e parë e madhe për qeverinë e Mahdit, e cila ka ardhur në pushtet gati një vit më parë.
Iraku ka një popullsi prej afro 40 milionë banorësh dhe është prodhuesi dhe eksportuesi i pestë më i madh i naftës në të gjithë botën, por shkalla e varfërisë së përgjithshme vlerësohet të jetë mbi 20 për qind./Reporteri.net/