Amerika ka ndaluar të gjitha llojet e udhëtimit të shtetasve joamerikanë që kanë qenë në Brazil. Mbi 650 persona humbën jetën nga sëmundja infektive në shtetin latin një ditë më parë ndërsa 15 mijë të tjerë u diagnostikuan rishtas me Covid-19.
Brazili është i vendi i dytë në botë me numrin më të madh të të infektuarve me koronavirus.
Për të shmangur përhapjen e infeksionit në territorin e vet, Shtetet e Bashkuara njoftuan të dielën se do të ndalojnë të gjitha llojet e udhëtimit nga shteti latin duke nisur nga data 28 maj.
Me urdhër të presidentit Donald Trump, kufizimet do të aplikohen për shtetasit joamerikanë që kanë vizituar Brazilin në dy javët e fundit, ndërsa personat që disponojnë kartën e gjelbër, kanë të afërmit në Amerikë apo janë pjesëtarë të ekuipazheve të avionëve do të përjashtohen nga masat.
Ministria e Jashtme e Brazilit tha se e mirëkupton vendimin dhe kufizime të ngjashme zbatojnë edhe autoritetet vendëse në bazë të kritereve pandemike, ndaj lajmi nuk cenon bashkëpunimin mes vendeve.
Javën e kaluar, Organizata Botërore e Shëndetësisë e shpalli Amerikën Latin qendrën e re të pandemisë.
Brazili raporton mbi 360 mijë bartës të koronavirusit dhe më shumë se 22 mijë viktima nga sëmundja infektive.
Republika federale ka mbyllur aktualisht kufijtë e vet tokësorë dhe ka ndalur udhëtimet nga vendet me norma të larta të infeksionit.
Të dielën mbështetësit e presidentit Zhair Bolsonaro iu drejtuan sërish rrugëve për të kërkuar heqjen e masave dhe rifillimin e aktiviteteve ekonomike.
Kreu i shtetit, ish-oficer ushtarak, është nga qortuesit më të fortë të kufizimeve ndërsa vetë vazhdon të mbetet në qendër të skandaleve politike, më i fundit për ndërhyrje politike në organet policore të vendit.