Policia e Kosovës nuk ka paraparë shtim të kontrolleve  gjatë ditës së Fitër Bajramit.

Zëdhënësi i policisë, Daut Hoxha ka thënë për Reporterin se do të vazhdojnë me planin operativ të cilin e kanë pasur qysh nga fillimi.

Hoxha ka thënë se policia bazuar në planin e hartuar qysh prej fillimit do të vazhdojë në realizimin e përgjegjësive dhe detyrave të saj edhe ditëve në vijim.

“Policia e Kosovës referuar vendimeve të institucioneve të Kosovës si dhe referuar planit dhe gatishmërisë së reagimit kundër koronavirusit, ka hartuar me kohë urdhrin operativ të kontrollit policor, të quajtur urdhri operativ për gatishmëri dhe reagim për koronavirus Covid 19. Policia të gjitha aktivitetet dhe masat e deritashme i ka ndërmarrë në koordinim të plotë me të gjitha institucionet kompetente në fushën e shëndetësisë dhe institucioneve tjera relevante konform edhe angazhimit dhe detyrave sipas planit për gatishmëri dhe reagim. Policia e Kosovës bazuar në urdhrin operativ që ka në implementimin e tij do të vazhdojë në realizimin e përgjegjësive dhe detyrave të saj edhe ditëve në vijim”, ka thënë Hoxha për Reporterin.

Se nuk janë paraparë masa tjera përveç atyre që janë në fuqi, gjatë ditës është konfirmuar edhe nga Ministria e Shëndetësisë. /Reporteri.net