Të mërkurën Amnesty International, organizata e famshme për të drejtat e njeriut, ka publikuar raportin e saj për vitin 2020/2021. Në raportin në të cilin flitet për gjendjen e të drejtave të njeriut nëpër botë, është përmendur edhe rasti i gjuajtjes me plumba të veturës së gazetarit Shkumbin Kajtazi.

Rasti i sulmit me plumba të veturës së gazetarit të Gazetës Online “Reporteri.net” ka gjetur vend në raportin voluminoz të Amnesty International që përmend të gjitha ngjarjet e rastet më të rëndësishme të evidentuara nëpër botë rreth të drejtave të njeriut, lirisë së shprehjes, dhunës ndaj grave, minoriteteve etj.

Në këtë raport thuhet se “në tetor, vetura e gazetarit Shkumbin Kajtazi u dëmtua nga të shtëna armësh jashtë shtëpisë së tij në Mitrovicë”.

Kujtojmë që vetura e gazetarit të Reporteri.net ishte sulmuar në tetor të 2020, për të cilin rast prokuroria ka inicuar rast për veprën penale “shkaktim i rrezikut të përgjithshëm”.

Gjuajtja me armë zjarri drejt veturës së Kajtazit ndodhi më 17 tetor rreth mesnatës në një rrugë në qendër të qytetit të Mitrovicës.

Ky sulm ishte i dyti ndaj Kajtazit pasi kohë më parë atij i ishte djegur vetura.

Amnesty International në raport ka përmendur edhe rastin edhe rastin e padisë për shpifje ndaj gazetares Jeta Xharra nga ana e ish-ministres për Integrime, Dhurata Hoxha, dhe gjuhën e ashpër të ish-kryeministrit Ramush Haradinaj kur i pati quajtur gazetarët “mercenar”.