Pas raportimeve për shpërthimin e sëmundjes PPR (Mortaja e Dhenve dhe Dhive) në disa zona të Shqipërisë, Agjencia e Ushqimit dhe Veterinarisë ka bërë thirrje për kujdes të shtuar, veçanërisht në zonat kufitare, shkruan Gazeta Online Reporteri.net.

Në një komunikatë zyrtare, fermerëve u kërkohet të marrin masa parandaluese për të ndalur përhapjen e sëmundjes në territorin e Kosovës.

“Duke marrë parasysh shpërthimin e sëmundjes PPR (Mortaja e Dhenve dhe Dhive) në disa zona të Shqipërisë, bëjmë thirrje për kujdes të shtuar nga fermerët në zonat kufitare të Republikës së Kosovës. Për të parandaluar përhapjen e sëmundjes në territorin tonë, kërkojmë që: Të evitoni çdo kontakt të drejtpërdrejtë të deleve dhe dhive me kafshë të ardhura nga territori i Shqipërisë; Të mbani kafshët tuaja të monitoruara; Të raportoni menjëherë te veterineri zyrtar çdo shenjë të dyshimtë të sëmundjes (ethet e larta, plagë në gojë, hundë ose sytë që rrjedhin, dobësi të përgjithshme); Të mos lejoni futjen e kafshëve tjera në tufat tuaja”, thuhet në komunikatën e AUV-it, duke theksuar se zbatimi i këtyre masave është thelbësor për mbrojtjen e tufave tuaja dhe parandalimin e përhapjes së sëmundjes në Kosovë.

/Reporteri.net/