TikTok-u është edhe një hap më afër ndalimit të tij në Shtetet e Bashkuara të Amerikës.

Kjo pasi një panel gjyqtarësh federalë të premten mbështetën një ligj të ri, që mund të çojë në ndalimin e aplikacionit për video i cili ka pronësi kineze.

Tre gjyqtarët, në Gjykatën e Apelit të ShBA-së për Qarkun e Distriktit të Kolumbisë, refuzuan peticionin e TikTok për të rrëzuar ligjin, raporton The New York Times.

Vendimi mund të jetë një goditje vdekjeprurëse për aplikacionin në një nga tregjet e tij më të mëdha.

Më shumë se 170 milionë amerikanë përdorin TikTok-un për të argëtuar dhe informuar veten, duke e kthyer atë në një fenomen kulturor.

Humbja e afërt e aplikacionit në Shtetet e Bashkuara kishte ngjallur shqetësim nga avokatët e fjalës së lirë dhe nga krijuesit, të ardhurat e të cilëve varen nga TikTok-u.

Vendimi ngre gjithashtu pyetje të reja për presidentin e sapozgjedhur Donald Trump, i cili ka sinjalizuar vazhdimisht mbështetjen e tij për aplikacionin, por që nuk ka një rrugë të qartë për ta shpëtuar atë sipas ligjit të ri, i cili është planifikuar të hyjë në fuqi ditë para inaugurimit të tij.