Një valë i nxehti afrikan ka përfshirë ditët e fundit, Italinë ndërkohë që pritet që deri në fund të javës të ketë rritje të vazhdueshme të temperaturave, që edhe për sezonin veror janë të pazakonta. Pjesa jugore e Italisë është më e prekura nga kjo valë, teksa pritet që në fundjavë temperaturat në Siçili të arrijnë deri në 46 gradë.

Ditën e sotme në Bari dhe në Kalabri janë regjistruar temperatura 41-42 gradë, duke bërë që këto të jenë ditët e qershorit më të nxehta të viteve të fundit. Ndërkohë, në qytetet e mëdha më në veri të vendit si Roma, Milano dhe Venecia temperaturat e larta janë shoqëruar edhe me lagështi në masën 80% duke rrezikuar kështu probleme në shëndetin e banorëve.

Për shkak të kësaj situata Ministria italiane e Shëndetësisë ka bërë thirrje veçanërisht për të moshuarit dhe ata me probleme në sistemin respirator të qëndrojnë në shtëpi gjatë orëve të drekës, kur temperaturat janë edhe më të larta.