Në një fjalim fort të nxehtë gjatë së mërkurës, udhëheqësi i Hezbollahut, Hassan Nasrallah, foli veçanërisht për Qipron, duke e kërcënuar se do t’ia mësyjë këtij ishulli të ndarë mesdhetar nëse i ndihmon Izraelit në një luftë të mundeshme mes grupit militant libanes dhe Izraelit, raportoi të premten CNN, transmeton gazeta online Reporteri.net.

“Qipro gjithashtu do të jetë pjesë e kësaj lufte”, u shpreh mes tjerash Nasrallahu duke thënë se kjo do të ndodhë nëse hap aeroportet dhe bazat e saj për forcat izraelite.

Presidenti i Qipros, Nikos Kristodoulides, duke komentuar këtë kërcënim të Nasrallah, mohoi se shteti është përfshirë në luftë.

“Këto deklarata s’janë të mira, por nuk korrespondojnë në asnjë mënyrë me atë që po tentohet të paraqitet, kinse një imazh se Qiproja është përfshirë në operacionet luftarake. Në asnjë mënyrë nuk jemi përfshirë”, tha presidenti i Qipros.

Reagimi i Bashkimit Evropian

Bashkimi Evropian i doli në ndihmë Qipros.

BE-ja tha se meqenëse ky ishull “është shtet anëtar i BE-së”, kjo do të thotë se “BE-ja është Qipro dhe Qiproja është BE”.

“Çdo kërcënim kundër një prej vendeve tona anëtare është kërcënim kundër BE-së”, tha zëdhënësi i BE-së Peter Stano.

Greqia, shteti fqinj

Edhe Greqia, si shtet fqinj, është përfshirë këtu. Ajo shprehu solidaritet me Qipron duke thënë se “kërcënimi për të përdorur forcë është shkelje flagrante e Kartës së Kombeve të Bashkuara”.

Pse është e rëndësishme vendndodhja e Qipros?

Një ishull në Mesdheun Lindor i vendosur në një vijë të çarjes gjeopolitike midis Lindjes së Mesme dhe Evropës Jugore, Qipro është gjeografikisht shumë më afër konflikteve në Lindjen e Mesme sesa qendrave të fuqisë evropiane.

Ishulli është dy herë më i madh se shteti amerikan i Delaware dhe është i ndarë në dy pjesë: një pjesë jugore që flet greqisht e njohur si Republika e Qipros dhe një rajon turqishtfolës i njohur si Republika Turke e Qipros Veriore. Ndarja e ishullit pasqyron rivalitetin midis armiqve rajonalë Greqisë dhe Turqisë. Shumica e komunitetit ndërkombëtar e njeh vetëm sovranitetin e pjesës greke të Qipros, dhe ky ishte vendi ndaj të cilit ishin drejtuar kërcënimet e Nasrallah, transmeton Reporteri.net.

Republika e Qipros është anëtare e BE-së, por jo e aleancës mbrojtëse të NATO-s, e cila i detyron vendet anëtare të dalin në mbrojtje të njëri-tjetrit në rast sulmi.

Qipro është shtëpi e rreth 920,000 njerëzve, me Nikosinë si kryeqytetin e saj.

Sa të ngushta janë lidhjet e Qipros me Izraelin?

Marrëdhëniet diplomatike midis Qipros dhe Izraelit filluan në vitin 1960, pas pavarësisë së ishullit nga sundimi kolonial britanik, por Qipro nuk hapi një ambasadë në Tel Aviv deri në vitin 1994. Marrëdhëniet u përkeqësuan në vitet 1980 dhe 1990 për çështje që përfshijnë lidhjet e ngushta të Izraelit me Turqinë dhe konflikti arabo-izraelit, në të cilin Qiproja ra në anën e shteteve arabe dhe mbështeti shtetësinë palestineze.

Lidhjet u rikthyen në fund të viteve 1990 dhe 2000, pasi Izraeli filloi të kthehej në Mesdheun Lindor për partneritet ekonomik, veçanërisht pas zbulimit të gazit natyror në rajon. Ekspertët thonë se Izraeli ka parë gjithashtu Qipron si një partner për të penguar kërcënimet rajonale, veçanërisht nga Turqia dhe grupet e lidhura me Iranin.

Izraeli vitet e fundit ka përdorur territorin qipriot për të trajnuar trupat e tij për një luftë të mundshme me Hezbollahun. Terreni i Qipros është i ngjashëm me atë të Libanit, kanë thënë Forcat Mbrojtëse të Izraelit (IDF), sipas mediave izraelite.

Në vitin 2022, IDF kreu një stërvitje të përbashkët ushtarake me forcat qipriote. Disa nga trajnimet e përbashkëta u fokusuan në luftimin e fronteve të shumta dhe fokusimin në luftimin e Hezbollahut në Liban. Stërvitjet e tyre të fundit u zhvilluan në maj të vitit 2023 në Qipro.

Presidenca qipriote tha të enjten se vendi “kurrë nuk ka ndihmuar dhe nuk do të lehtësojë asnjë veprim agresiv ose sulm kundër ndonjë vendi”./Reporteri.net/.