SHBA i bën thirrje Koresë së Veriut t’i ndalë testet raketore dhe të kthehet në bisedime

Shtetet e Bashkuara të dielën i kërkuan Koresë së Veriut që të ndalë testet e saj raketore “shqetësuese dhe joproduktive” dhe të angazhohet në bisedimet e paqes.

“Qëllimi ynë mbetet denuklearizimi i plotë i Gadishullit Korean”, tha Sung Kim, përfaqësuesi special i SHBA-së për Korenë e Veriut.

“Kjo është arsyeja pse testi i fundit i raketës balistike i Penianit, një nga disa në gjashtë javët e fundit, është shqetësues dhe kundërproduktiv për të bërë përparim drejt paqes së qëndrueshme në Gadishullin Korean”, shtoi ai.

Javën e kaluar, Koreja e Veriut testoi raketën e saj balistike nëndetëse të zhvilluar rishtazi në raundin e pestë të testeve të armëve. Zyrtarët e Koresë së Jugut thanë se arma duket të jetë në fazat e hershme të zhvillimit. Raketat e lëshuara nga nëndetëset janë më të vështira për t’u zbuluar paraprakisht.

“Ne mbetemi gati për t’u takuar me KPRK-në pa parakushte dhe e kemi bërë të qartë se Shtetet e Bashkuara nuk kanë asnjë qëllim armiqësor ndaj KPRK-së,” tha Kim, duke iu referuar Koresë së Veriut me emrin e saj zyrtar, Republika Popullore Demokratike e Koresë.

Administrata Biden ka thënë vazhdimisht se është e hapur për bisedime me Korenë e Veriut. Megjithatë, Koreja e Veriut ka kritikuar SHBA-në për politikat e saj armiqësore, sanksionet dhe stërvitjet e rregullta ushtarake të kryera me Korenë e Jugut, shkruan DW, përcjell Klankosova.tv.

Udhëheqësi i Koresë së Veriut Kim Jong Un ka fajësuar politikat amerikane ndaj kombit të izoluar dhe hodhi poshtë pretendimet e Uashingtonit se nuk ka qëllime armiqësore. Ai u takua tre herë me ish-presidentin amerikan Donald Trump, por bisedimet e tyre nuk arritën një marrëveshje.