Venezuela i është kundërpërgjigjur sanksioneve të BE-së duke përjashtuar ambasadoren e Unionit nga kryeqyteti i shtetit Amerikano-jugor.

“Pas një vendimi të Presidentit Nicolas Maduro, kemi lajmëruar ambasadoren e BE Isabel Brihlante Pedrosa për deklarimin e saj si “persona non grata”. Ajo ka 72 orë kohë të largohet nga territori i shtetit”- është shprehur Ministri i Jashtëm i Venezuelës Jorge Arreaza.

Vendimi për përjashtimin e diplomates europiane ka ardhur pasi Brukseli i shtoi sanksionet kundër regjimit të Maduros për të shtyrë këtë të fundit të respektojë të drejtat e njeriut dhe të zhvillojë zgjedhje të lira.

Nga ana e saj BE e ka konsideruar vendimin të gabuar dhe që do të sjellë më shumë izolim për shtetin e Amerikës Latine.