Udhëheqësi kinez, Xi Jinping u ka bërë thirrje “fuqive të mëdha” që të ndihmojnë në de-përshkallëzimin e konfliktit me Iranin gjatë një bisede telefonike me presidentin rus Vladimir Putin — një mesazh i tërthortë drejtuar presidentit amerikan Donald Trump, i cili po shqyrton përfshirjen e mëtejshme të SHBA-së, shkruan CNN, përcjell Reporteri.net.

Sipas njoftimit nga Ministria e Jashtme kineze, Xi tha se “bashkësia ndërkombëtare, veçanërisht fuqitë e mëdha që kanë ndikim të veçantë mbi palët në konflikt, duhet të bëjnë përpjekje për të ftohur situatën, jo për ta përshkallëzuar atë”.

Gjatë bisedës, Xi u bëri thirrje palëve që të ndalojnë menjëherë përplasjet ushtarake, duke theksuar se “palët në konflikt, veçanërisht Izraeli, duhet të ndalojë zjarrin sa më shpejt për të parandaluar përshkallëzimin e mëtejshëm të situatës dhe për të shmangur me vendosmëri përhapjen e luftës”.

Nga ana e tij, Putin dënoi veprimet e Izraelit kundër Iranit dhe ritheksoi gatishmërinë e Rusisë për të ndërmjetësuar nëse është e nevojshme, gjë që gjeti mbështetjen e liderit kinez.

“Presidenti rus konfirmoi gatishmërinë e Rusisë për të ndërmarrë përpjekje ndërmjetësimi nëse kërkohet. Udhëheqësi kinez shprehu mbështetje për këtë ndërmjetësim, duke e konsideruar atë si një kontribut të mundshëm për uljen e tensioneve,” tha këshilltari i Kremlinit, Yuri Ushakov.

Të dy liderët ranë dakord që të mbajnë kontakte të ngushta midis shërbimeve të tyre diplomatike dhe të sigurisë në ditët në vijim, ndërsa u pajtuan se nuk ka zgjidhje ushtarake as për konfliktin aktual, as për çështjen e programit bërthamor iranian — këto, sipas tyre, duhet të zgjidhen vetëm me mjete politike dhe diplomatike.