Presidenti ukrainas Volodymyr Zelensky është gati të flasë drejtpërdrejt me homologun e tij rus, Vladimir Putin, por “vetëm pa asnjë ndërmjetës”, tha ai për kanalin televiziv italian Rai 1.

Zelensky tha se do të fliste me Putinin, “vetëm në aspektin e dialogut dhe jo për aspektin e ultimatumeve”.

Ai tha se “hapi i parë i qartë”, për mbajtjen e bisedimeve do të ishte kur Rusia të tërheqë trupat e saj nga Ukraina.

Zelensky shtoi se sa më shumë raste të “brutalitetit të hapur” nga ruset, si ato në Bucha, Borodyanka apo Mariupol, aq më pak tolerant do të jetë ai ndaj çdo negociate me Rusinë.

Ukraina dhe Rusia nuk kanë zhvilluar bisedime ballë për ballë që nga 29 marsi dhe kryenegociatori i Moskës, Vladimir Medisnky, që atëherë ka thënë se bisedimet e paqes po mbaheshin nga distanca.