Hetuesit e Gjykatës Speciale kanë arrestuar sot dy prej krerëve të Organizatës së Luftës së Ushtrisë Çlirimtare të Kosovës. Kryetari i OVL-së së UÇK-së, Hysni Gucati dhe nënkryetari Nasim Haradinaj janë arrestuar nga hetuesit e kësaj gjykate, shkruan Reporteri.net.
Por vetëm lideri i AAK-së, Ramush Haradinaj ka reaguar pas këtyre zhvillimeve.
Presidenti Hashim Thaçi, kryeministri Abdullah Hoti,kryetarja e Kuvendit, Vjosa Osmani e krerët e partive të tjera politike nuk kanë thënë asnjë fjalë të vetme lidhur me arrestimet dhe bastisjen e zyrave të OVL-së së UÇK-së.
Para mesditës fprca të shumta të Policisë së EULEX-it, janë futur në zyrat e kësaj organizate. Fillimisht nuk dihej pse po ndodhë i tërë ky aksion.
Vetëm pak më vonë është arrestuar dhe dërguar për në Hagë, kryetari i OVL-së së UÇK-së Hysni Gucati.
Pas disa orëve derisa po hynte në një emision në T7 është arrestuar edhe nënkryetari Nasim Haradinaj.
Vetëm Ramush Haradinaj ka reaguar pas zhvillimeve të fundit në OVL-UÇK. Haradinaj ka përsëritur edhe një herë si sipas tij publikimi i dosjeve të Gjykatës Speciale ka qenë i gabuar dhe se do e dëmtojë më së shumti shtetin tonë, përfshirë edhe vet të akuzuarit, shkruan Reporteri.net.
Ai ka apeluar te organet e te organet e drejtësisë, vendore dhe ndërkombëtare, që të respektojnë të drejtat e të gjithëve derisa ka thënë se asnjë i akuzuar nuk do t’i ik drejtësisë.
“E ritheksoj qëndrimin tim, se publikimi i dosjeve të Gjykatës Speciale ka qenë i gabuar dhe se do e dëmtojë më së shumti shtetin tonë, përfshirë edhe vet të akuzuarit.
Tentimi për të krijuar imazhin se Kosova është e mobilizuar ta pengojë drejtësinë është i gabuar. Ne nuk kemi qenë e as nuk jemi në anën e kundërt të drejtësisë.
Apeloj te organet e drejtësisë, vendore dhe ndërkombëtare, që të respektojnë të drejtat e të gjithëve. Asnjë i akuzuar nuk do t’i ik drejtësisë.
Konsideroj se nuk ka arsye për operacione e bastisje, sepse secili do t’i përgjigjet vullnetarisht drejtësisë.
Kosova është gjithmonë me ligjin dhe me viktimat, sepse vet ishte viktimë e padrejtësive. Vet UÇK-ja dhe populli i Kosovës kanë argumentuar se gjithmonë janë pozicionuar në anën e drejtësisë, të vërtetës, dhe të drejtës ndërkombëtare. Kjo nuk ka ndryshuar asnjëherë!”, ka shkruar Haradinaj.
Hetuesit e Speciales janë parë të hyjnë e dalin me pako në të cilat supozohet se kanë marrë dosjet e Gjykatës Speciale që janë dërguar nga persona të panjohur në zyrat e organizatës.