Anëtari i kryesisë së LDK-së, njëherësh ministër në detyrë i Bujqësisë, Pylltarisë dhe Zhvillimit Rural, Besian Mustafa ka thënë se ministrat e LDK-së, e kanë marrë detyrën nga udhëheqja e partisë për të përballuar situatën me COVID-19, andaj vlerëson se të gjitha punët i kanë kryer me përkushtim të plotë.

Reagimi i tij erdhi pas fjalimit të kryeministrit Kurti në mbledhjen e Qeverisë në detyrë ku iu referua LDK-së si “regjimi i vjetër”.

Mustafa ka thënë se në këtë kohë nuk kanë bërë politikë, por janë munduar të jenë në nivel të detyrës për të përballuar situatën e pandemisë.

“Ne ministrat e LDK-së e kemi marrë detyrën nga udhëheqja e partisë sonë, që të bëjmë ose të japim maksimumin tonë për menaxhimin e pandemisë dhe të dikastereve për të cilat jemi përcaktuar. Siç kam thënë edhe në mbledhjen e qeverisë, ne nuk kemi bërë politikë, por kemi dhënë maksimumin tonë profesionalë e politikë, gjithnjë me qëllimin përfundimtar që të përkrahim përfituesit, qoftë qytetarët, qoftë bujqit në rastin e Ministrisë së Bujqësisë dhe këtë edhe e kemi bërë”, thotë Mustafa.

Ministrat e LDK pavarësisht mocionit të mosbesimit ndaj Qeverisë Kurti, kanë vazhduar punën në dikasteret përkatëse, duke mos lën vakuum institucional në këtë kohë pandemie.