Diplomati gjerman: Jo ndarje territoresh, s’ka BE për Serbinë pa e njohur Kosovën

Diplomati gjerman, Wolfgang Ischinger, ka thënë se Serbia nuk duhet të pranohet në Bashkimin Evropian pa e njohur Kosovën si shtet i pavarur.


Ai përmes një postimi në Twitter ka thënë se pas Samitit të Berlinit tashmë është bërë e qartë se nuk duhet të ketë diskutime për ndarje territoresh në vija etnike.

Ischinger ka thënë se Kosova duhet të heqë taksën ndaj mallrave serbe dhe të fitojë menjëherë liberalizimin e vizave.

“Tani të gjithë e dinë pak më mirë se çka nuk është e dëshirueshme. Por si të vazhdohet tutje? Çka duhet të fitojë Serbia (për ta njohur Kosovën)? Rrugë të përshpejtuar për anëtarësim në BE? Por është e qartë – pa njohje – s’ka anëtarësim! Dhe Kosova do të duhej të ndalë taksën dhe të fitojë lëvizjen pa viza, menjëherë!” ka shkruar ai në Twitter, shkruan Reporteri.net.

Ndryshe në Samitin e Berlinit u kërkua edhe heqja e taksës ndaj produkteve serbe por që delegacioni i Kosovës nuk pranoi.

Ndërsa presidenti serb, Aleksandar Vuçiq deklaroi se “ideja ime për shkëmbim territoresh ka vdekur”.

Kujtojmë se Samiti i radhës mbahet në Paris më 1 korrik për çka presidenti i Kosovës Hashim Thaçi ka thënë se shpreson që do ketë lëvizje pozitive për dallim nga ai i Berlinit ku nuk u arrit asnjë rezultat. /Reporteri.net/.