Ministrja e Drejtësisë Albulena Haxhiu duke folur për mundësinë e bërjes së numrave për zgjedhjen Vjosa Osmanit presidente të vendit, ka thënë se kanë biseduar me deputetë të ndryshëm, por asgjë askujt nuk i kanë premtuar në këmbim të votës.
Haxhiu në një prononcim për Kanal 10, ka thënë se Vetëvendosje nuk vepron me mendësinë e politikës së kaluar kur deputetëve në këmbim të votës iu jepnin favore.
E pyetur nëse në këmbim të votave janë dhënë poste të zëvendësministrave, Haxhiu e ka mohuar duke thënë se mendësia e së kaluarës duhet të përfundojë.
Megjithatë, Gazeta Online Reporteri.net, ka mësuar se vota e 80 është siguruar, dhe ajo do të jetë e deputetit minoritar Adem Hoxha, i cili dje nuk ishte në seancë.
Në këmbim të kësaj vote, partia e tij ka marrë një zëvendësministër, dhe këtë për Gazetën Online Reporteri.net, e ka konfirmuar vetë deputeti Hoxha.