Ambasadori amerikan, Jeff Hovenier në tubimin përkujtimor në 25-vjetorin e masakrës në Krushë të Madhe ka thënë se është i nderuar se sot ndodhet këtu, në vendin ku 250 civilë të pafajshëm u vranë nga forcat e Milloshevqit. Hovenier, tha të martën se NATO-ja ndërhyri 25 vjet më parë për t’i dhënë fund luftës në Kosovë pikërisht për shkak të ngjarjeve si ajo në Krushë të Madhe, shkruan Gazeta Online Reporteri.net.

Ambasadori Hovenier theksoi se NATO-ja veproi pikërisht për shkak të krimeve të tmerrshme që kishin ndodhur në Krushë të madhe, e për t’i dhënë fund fushatës së tmerrshme të spastrimit etnik.

“Jam i nderuar që jam këtu bashkë me juve që përkujtojmë të gjithë ata që kanë humbur jetën në Krushë të Madhe, 25 vjet më parë. Jemi mbledhur këtu për të qenë dëshmitarë të asaj që ka ndodhur. Me 25 mars 1999, vetëm një ditë pasi NATO filloi fushatën e saj, për t’i dhënë fund fushatës së tmerrshme të spastrimit etnik, forcat e Millosheviqit hyn në këtë fshat dhe vranë 250 civile të pafajshëm. NATO-ja veproi pikërisht për shkak të krimeve të tmerrshme si ky që kishte ndodhur këtu”.

Hovenier kujtoi edhe një deklaratë të sekretares Albright atë kohë, ku kishte thënë se ishte e pamundur të negociohej me Serbinë, pasi Millosheviqi po sulmonte civilët dhe po digjte fshatrat.

Në ditën e njëjtë, sekretarja e athershme Albright tha “E kemi të pamundur të negocioojmë derisa Millosheviqi i sulmon civilët dhe i djeg fshatet në Kosovë. Si aleancë u bëmë bashkë për të vepruar pasi i kemi shteruar të gjitha alternativat për të ndalur gjakderdhjen. Prandaj është tepër e duhur që këtu në Krushë të Madhe dëshmojmë për këtë tragjedi”, tha Hovenier.

“Si përfaqësues i Presidentit të Shteteve të Bashkuara të Amerikës në Republikën e Kosovës, dëshiroj të shpreh ngushëllime dhe solidaritetin tim me të gjithë të prekurit nga kjo ngjarje e tmerrshme, si dhe dëshiroj të shpreh mirënjohje për të jetësuar muzeun dhe memorialin që po jetësojmë sot. Kam marrë vesh se shumë prej jush keni avokuar që ta keni këtë muze gjatë 25 viteve të shkuara dhe është tamam e duhur që ky muze të jetë tamam një dëshmi fizike e ngjarjeve të tmerrshme që kanë ndodhur këtu dhe do të bëjë të mundshme të mos i harrojmë kurrë ato mizori”, tha ambasadori amerikan, Jeff Hovenier.

Ambasadori amerikan tha para të pranishmëve se ShBA-ja qëndron përkrah popullit të Kosovës dhe se janë të përkushtuar për bashkëpunim, me qëllim të sigurimit që çdo indivit në Kosovë të jetojë në kushte të dinjitetshme, sigurie e lire, pa marrë parasysh etninë.

“Shtetet e Bashkuara të Amerikës qëndrojnë përkrah popullit të Kosovës dhe jemi të përkushtuar që të bashkëpunojmë me ju për të siguruar që çdo individ në Kosovë mund të jetojë në kushte të dinjitetit, lirisë, sigurisë, pa marrë parasysh përkatësinë etnike apo rrethanat. Shpresoj që mund të qëndrojmë së bashku dhe të shohim kah e ardhmja, ofron mundësi të shumta”, tha Hovenier./Reporteri.net/