×
  • Lajme
  • Lajme / Zhvillimet në veri

    Kearns: Shqetësues sulmi i orkestruar ndaj Policisë së Kosovës, pamjet shfaqin milici të pajisur mirë

    Reporteri
    24 Shtator 2023 | 14:18

    Kryetarja e Komitetit për Çështjet e Jashtme në Dhomën e Përfaqësuesve të Britanisë së Madhe, Alicia Kearns, ka reaguar për  sulmin, siç e ka quajtur ajo, të orkestruar ndaj Policisë së Kosovës.

    Kearns ka thënë se imazhet fillestare, sipas saj, tregojnë se personat e armatosur në veri të Kosovës janë milici të financuara mirë dhe të pajisura, duke përfshirë edhe automjete të blinduara.

    Policia e Kosovës, sipas saj, duhet të jetë në gjendje të mbrojë sundimin e ligjit pa kërcënim të dhunës.

    “Thellësisht shqetësuese të shohësh një tjetër sulm të orkestruar ndaj forcave të rendit në Kosovë.

    Zemra ime është me familjet e rreshterit të policisë të vrarë dhe të lënduarve që u shërbejnë komuniteteve të Kosovës.

    Policia e Kosovës duhet të jetë në gjendje të mbrojë sundimin e ligjit pa kërcënim të dhunës”, ka shkruar Kearns.

    Alicia Kearns, deputete britanike dhe kryetare e Komisionit për Politikë të Jashtme të Parlamentit Britanik, deklaroi në Parlament, më 4 korrik të këtij viti, se armët kontrabandohen nga Serbia në Kosovë me autoambulanca dhe se ato “deponohen” në ambientet e Kishës Ortodokse Serbe. /Reporteri.net/

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!