Drejtoresha e Qendrës britanike për Shoqëri dhe Shëndet Mendor, Hanna Kienzler, ka komentuar parkimin e djeshëm pavend të misionit evropian për sundimin e ligjit në Kosovë, EULEX.
Në një postim në Twitter, Kienzler ka thënë se Kosova për komunitetin ndërkombëtar është një laborator eksperimental ku bëhet çdo gjë.
“Pse u bë bujë rreth një parkimi të gabuar të veturës së EULEX-it? Kërkimfalja e EULEX-it për sjelljen nuk ka kuptim. Nuk është absolutisht sjellje individuale – situata simbolizon mënyrën se si komuniteti ndërkombëtar e ka trajtuar Kosovën që nga lufta: një laborator eksperimental ku bëhet çdo gjë”, ka shkruar ajo, përcjell Gazeta Online Reporteri.net.
Why the fuss around a wrongly parked @EULEXKosovo car? The #EULEX apology for the behavior misses the point. Its not abt individual behavior-the situation symbolizes how the international community has treated #Kosovo since the war: an experimental laboratory where anything goes. https://t.co/gjzbL43qfw
— Dr. Hanna Kienzler (@HannaKienzler) October 24, 2021
Kujtojmë, se në një video të postuar dje në Facebook nga “Vrojtuesit e lagjes”, dëgjohet teksa një qytetar i Kosovës e pyet zyrtarin e EULEX-it, që ka parkuar veturën në zonë ku s’është e lejuar, se “a e parkon veturën kështu në shtetin tuaj?”
Përgjigja e zyrtarit ndërkombëtar ka qenë “Parkoj kështu në Kosovë”.
Pas kësaj, misioni i EULEX-it në Kosovë ka dënuar sjelljen e zyrtarit të tyre për parkimin e gabuar të veturës zyrtare.
Pas një sërë raportimesh të qytetarëve nëpër rrjete sociale, EULEX-i në Twitter ka dënuar veprimin e zyrtarit të tyre dhe janë zotuar se do të marrin masa disiplinore ndaj tij.
“E dënojmë me termat më të fuqishëm sjelljen e anëtarit të stafit të EULEX-it, i cili është parë duke e parkuar veturën në mënyrë jo të duhur në Prishtinë. Ne garantojmë se do të marrim masa të duhura disiplinore. E falënderojmë qytetarin e Kosovës që e solli këtë rast në dritë për sjelljen e tij të përgjegjshme”, thuhet në postimin e EULEX-it. /Reporteri.net/