Korona merr vrull në kulmin e sezonit turistik në Evropë: A mund të prishë një valë e re pushimet, dhe si qëndron gjendja në Shqipëri?

Vendet evropiane po shohin një rritje të konsiderueshme të rasteve me Covid-19 të nxitur nga nënvariantet shumë infektive të Omicron, duke rritur frikën për një valë të re globale të sëmundjes ndërsa imuniteti bie, pikërisht në kohën e fillimit të sezonit të udhëtimeve verore.

Qendra Evropiane për Parandalimin dhe Kontrollin e Sëmundjeve (ECDC) paralajmëroi javën e kaluar se “rritja e varianteve BA.4 dhe BA.5 sugjeron se ato do të bëhen dominuese” në të gjithë Bashkimin Evropian dhe ka të ngjarë të rezultojë në një rritje të rasteve të reja.

Një rritje e infeksioneve është regjistruar në disa vende, përfshirë Greqinë, Italinë, Spanjën, Francën, Austrinë, Portugalinë, Gjermaninë dhe Zvicrën, sipas të dhënave nga projekti OWID, pra Universiteti i Oksfordit, i cili monitoron pandeminë.

Studimet e reja kanë treguar se nënvariantet e omicron BA.4 dhe BA.5 kanë një avantazh në rritje te të sëmurët në krahasim me variantet e mëparshme dhe duket se janë të mirë në shmangien e sistemit imunitar. Me fjalë të tjera, as infeksionet e mëparshme dhe as vaksinat nuk ofrojnë mbrojtje veçanërisht të fortë kundër nënvarianteve, kjo është arsyeja pse ato bëhen dominuese. Megjithëse nënvariantet e reja nuk duket se çojnë në manifestime të rënda klinike, por një rritje e rasteve mund të çojë në një rritje të shtrimeve në spital dhe vdekjeve, tha ECDC.

Greqia në të kuqe

Ndikimi i mundshëm i nënvarianteve është më i dukshëm në Greqi, ku nxiti një rritje të ndjeshme të infeksioneve Covid-19. Të premten në vend u regjistruan 15,806 raste të reja të infeksionit, numër jashtëzakonisht i madh për një vend turistik dhe jo aq të madh.

Sipas Organizatës Kombëtare të Shëndetit Publik Grek, nga ky numër, 3127 janë të riinfektuar. Të premten vdiqën gjithashtu 14 pacientë, ndërsa 95 ishin në ventilatorë.

Përveç Athinës, më së shumti raste janë regjistruar në Selanik – 1335. Sa i përket destinacioneve të njohura turistike, në Chania në Kretë ishin 408 të infektuar, në Heraklion 771 dhe në Halkidiki 106. Deri në 286 raste të reja u regjistruan në Evia, 90 në Zakynthos dhe vetëm nëntë në Thassos. 362 raste të reja u zbuluan në Korfuz, 63 në Kefalonia, 31 në Lefkada, 265 në Rodos dhe 16 në Sporades (Skiathos dhe Skopelos).

Në mbështetje të kësaj, për ekspertët grekë është veçanërisht shqetësues kërkimi i Grupit Epidemiologjik të Ujërave të Zeza të Organizatës Kombëtare të Shëndetit Publik, i cili zbuloi se trendi i përqendrimit të viruseve në ujërat e zeza në Selanik është rritur.

Sa i përket vetë masave në Greqi, ato janë “ngrirë” deri më 1 shtator, pra për kohëzgjatjen e sezonit turistik. Është hequr detyrimi i certifikatës ose testit negativ gjatë kalimit të kufirit, dhe certifikata nuk do të kërkohet më as për qëndrime në objekte hoteliere. Për më tepër, mbajtja e maskës nuk është më e detyrueshme, përveç në objektet e kujdesit shëndetësor dhe shtëpitë e pleqve.

Si është në destinacionet e tjera?

Në Mal të Zi, numri i të infektuarve është rritur me rreth 130 për qind në dy javët e fundit, ndërsa për sa i përket numrit të rasteve aktive, aktualisht kryesojnë bashkitë bregdetare, gjë që është e kuptueshme duke pasur parasysh sezonin turistik veror.

Sipas numrit të rasteve aktive në raport me numrin e banorëve të regjistruar, situata më komplekse epidemike është në Budva, pastaj në Kotorr, e edhe në Tivar me 172 të infektuar. Në kryeqytet janë 556 raste aktive me Covid 19, që është pothuajse gjysma e të gjithë të infektuarve aktualisht në vend, ndërsa e vetmja komunë pa të infektuar është Gucia.

Sipas masave që janë në fuqi prej muajsh, nuk ka kufizime në formën e certifikatave COVID për hyrje në vend, mbajtja e maskave mbrojtëse është e detyrueshme vetëm në institucionet shëndetësore, akomodimin kolektiv dhe transportin publik.

Turqia gjithashtu regjistroi një rritje të moderuar prej 50 për qind në numrin e rasteve të reja, të cilat ishin mesatarisht 7,500 javën e kaluar. Turqia përndryshe ka lëvizur në publikimin e të dhënave javore të rasteve dhe ka lehtësuar kufizimet duke përfshirë kërkesat e hyrjes dhe mbajtjen e detyrueshme të maskave.

Edhe Kroacia shënon rritje të moderuar të numrit të të sëmurëve dhe epidemiologia e Institutit Kroat për Shëndet Publik, Iva Pem Novosel, thotë se është ende herët të flitet për fillimin e një vale të re. Ajo, nga ana tjetër, ka paralajmëruar mundësinë e mbajtjes së detyrueshme të maskave në transportin publik nëse numrat vazhdojnë të rriten.

1047 raste të reja u regjistruan në Kroaci të premten, dhe më të infektuarit ishin në qarkun Split-Dalmaci, Zadar, Primorje-Gorski Kotar dhe qytetin e Zagrebit.

Shqipëria

Shqipëria si vendi turistik më i preferuar për shqiptarët e Kosovës, vazhdon të jetë në numra të kontrollueshëm sa i përket rasteve. Ditën e djeshme janë kryer 442 testime, nga të cilat kanë rezultuar pozitivë me COVID19, 147 qytetarë, në këto bashki:
61 në Tiranë, 14 në Fier, 11 në Lushnje, 10 në Durrës, 8 në Berat, nga 6 qytetarë në Vorë, Divjakë, Gramsh, 4 në Pogradec, nga 3 qytetarë në Shkodër, Kurbin, Kavajë, Gjirokastër, nga 2 qytetarë në Tropojë, Devoll, nga 1 qytetar në Lezhë, Vlorë, Selenicë, Kolonjë, Dimal. Ndërsa në raste aktive me Covid raportohet të jenë 3,640 në gjithë vendin.

Si mund të ndikojë vala e re në udhëtime?

Antoine Flau, drejtor i Institutit të Shëndetit Publik të Universitetit të Gjenevës, duke folur për “ France24“ thotë se literatura shkencore tregon qartë se udhëtimet dhe lëvizjet e popullsisë rrisin përhapjen e viruseve, veçanërisht të atyre shumë ngjitëse si SARS-CoV-2.

Ai thotë se ka shenja të qarta të hershme të një vale të re të pandemisë në Evropën Perëndimore, e cila duket se drejtohet kryesisht nga varianti BA.5 dhe BA.4, i cili tashmë është dominues në Afrikën e Jugut dhe Portugali.

Ai gjithashtu thekson se shumica e demokracive kanë braktisur kufizimet e rrepta, duke zgjedhur qasje më liberale që lejojnë njerëzit të mbrojnë veten kur ndiejnë nevojën.

Paralajmërim i OBSH-së për Evropën

Organizata Botërore e Shëndetësisë (OBSH) njoftoi dje se pret një “nivel të lartë” të rasteve të Covid-19 në Evropë këtë verë dhe u bëri thirrje anëtarëve të saj që të monitorojnë nga afër situatën pasi infeksionet janë trefishuar në muajin e kaluar.

“Për shkak se vendet në të gjithë Evropën kanë qenë në distancim social, virusi do të qarkullojë në nivele të larta këtë verë”, tha drejtori i OBSH-së për Evropën, Hans Kluge.

“Virusi nuk do të zhduket vetëm sepse vendet kanë ndaluar së monitoruari atë. Ai vazhdon të infektojë, vazhdon të ndryshojë dhe vret,” tha ai në një deklaratë me shkrim për AFP.

Numri i rasteve me Covid 19 në 50 vendet e zonës së OBSH-së në Evropë ka arritur në 500,000 në ditë këtë javë, ndërsa në fund të majit ishte 150,000, sipas të dhënave të mbledhura nga Agjencia. Numri i vdekjeve, i cili arrinte katër deri në pesë mijë në ditë në dimër, është ende i ulët, rreth 500, afërsisht në të njëjtin nivel me verën e vitit 2020.

“Shpresojmë që programet e rëndësishme të vaksinimit të zbatuara nga shumica e vendeve anëtare, si dhe infeksionet e mëparshme, do të na lejojnë të shmangim pasojat më të këqija, siç kemi vërejtur në fillim të pandemisë. Ndërkohë, rekomandimet tona mbeten në fuqi. “tha OBSH.

OBSH gjithashtu u bëri thirrje evropianëve të qëndrojnë në izolim nëse kanë probleme me frymëmarrjen, të marrin doza përforcuese dhe të mbajnë maska në vendet e mbushura me njerëz. /Reporteri.net