Kryetari i Partisë Demokratike të Kosovës, Memli Krasniqi ka thënë se Albin Kurti po vazhdon të mbajë peng deputetët dhe institucionet e vendit, shkruan Reporteri.net.

Ai theksoi se kanë kaluar tre muaj nga mbajtja e zgjedhjeve dhe Kosova s’ka as Kuvend e as Qeveri.

“Kemi fatkeqësi institucionale, po e them kështu figurativisht. Për shkak të tij, kryeneqësisë së tij”, tha Krasniqi referuar kryetarit të VV-së, Albin Kurtit.

Sipas Krasniqit, Osmani mund të marrë një rol për një takim.

“Presidentja mund të marrë një rol, të paktën për të organizuar atë tryezë të cilën e kemi hamendësuar edhe ne. I takon asaj që të vendos kur. PDK e dini që në çfarëdo takimi që mund të ndërlidhet me zhbllokimin e situatës, do të marrë pjesë.

“Çdo iniciativë që ka për qëllim me dalë prej krizës, me dalë prej bllokadës, PDK-ja e mbështet dhe do ta mbështesë”, tha Krasniqi.

Sot ka dështuar për herë të 14 seanca për konstituimin e Kuvendit.

VV-ja nuk arriti ta bëjë as në këtë seancë votimin e fshehtë, pasi mori veç 52 vota, derisa partitë tjera nuk propozuan anëtarë të Komisionit dhe rrjedhimisht s’morën pjesë fare në votim.

/Reporteri.net/