Dy partitë opozitare, Lidhja Demokratike e Kosovës dhe Aleanca për Ardhmërinë e Kosovës ditët e fundit kanë dhënë disa premtime për rritje pagash, konkretisht në shëndetësi e arsim, e që sipas tyre do të realizohen në momentin që vijnë në pushtet, shkruan Reporteri.net.

Lidhja Demokratike e Kosovës më 20 qershor ka mbajtur takimin e me Departamentin e Shëndetësisë, ku në praninë e shumë mjekëve e profesionistëve të fushës u diskutua rreth sfidave kryesore të qytetarëve në sistemin shëndetësor, mungesës së barnave esenciale, listës së pritjes, sigurimeve shëndetësore, e shumë çështje të tjera, të cilat vazhdojnë të mbesin sfidë e sistemit shëndetësor në Kosovë.

Një nga premtimet që ka bërë LDK në kë takim është rritja e koeficientit të pagave në shëndetësi në vlerën 150 euro. Kështu ka shkruar dhe kryetari i kësaj partie Lumir Abdixhiku në Facebook ku ka kritikuar Qeverinë Kurti për gjendjen e rëndë në këtë dikaster.

Ai ka premtuar edhe investime në shëndetësi, sigurime shëndetësore, digjitalizim të plotë të shëndetësisë etj.

Postimi i Abdixhikut i bërë më 20 qershor:

Sot, konstituam Departamentin e Shëndetësisë, brenda Lidhjes Demokratike të Kosovës. Pas Arsimit, Ekonomisë e Mbrojtjes, ky është departamenti i katërt i themeluar tashmë. Do të themelohen gjithsej 21 sosh.

Mes profesionistëve të fushës, mjekëve e stafit shëndetësor, diskutuam jo vetëm për gjendjen e rëndë aktuale të shëndetësisë në Kosovë, por dhe për zotimet kryesore të programit tonë politik ‘Rruga e Re’.

✅ Qendër e re spitalore, me investim plot 250 milionë euro.

✅ Sigurime shëndetësore 3.5% + 3.5%.

✅ Digjitalizim i plotë i shëndetësisë dhe sistem informativ shëndetësor.

✅ Menaxhim ndërkombëtar i spitaleve.

✅ Plot 150 milion euro investime në pajisje të reja.

✅ Koeficient 150 për stafin shëndetësor.

Këto janë disa nga projektet kryesore në programin aktual ‘Rruga e Re’.

Rrugën e bëjmë bashkë!

AAK e Haradinajt ju premton mësimdhënësve rritje të pagave

Premtime ka bërë edhe AAK-ja e Ramush Haradinajt, por kjo parti për mësimdhënësit.

Grupi i ekspertëve të AAK-së në lëminë e Arsimit dje në takimin e mbajtur ka premtuar se rritje të pagës për punëtorët e arsimit në të gjitha nivelet për 50%, shkruan Reporteri.net.

Postimi i plotë i AAK-së:

Grupi i ekspertëve të AAK-së në lëminë e Arsimit sot ka diskutuar disa nga prioritetet që do të përfshihen në Pogramit zgjedhor të AAK-së 2025-2028, duke i veçuar si më të rëndësishme disa prej tyre:

1. Sfidat në sistemin arsimor të Kosovës e determinojnë një reformë thelbësore te këtij sektori;

2. Rritja e buxhetit për Arsim në 6% të GDP-së;

3. Rritja e pagës për punëtorët e arsimit në të gjitha nivelet për 50%;

4. Përmirësimi i infrastruktures fizike duke u përshtatur me kriteret bashkëkohore;

5. Trajtimi në mënyrë të barabartë të universiteve publike dhe private përmes monitorimit të performancës;

6. Profilizimi i institucioneve të arsimit të lartë dhe pavarësimi financiar i tyre;

7. Tekste falas për arsimin parauniversitar;

8. Arsimi gjithëpërfshirës dhe garantimi i kuadrit profesional për fëmijet me nevoja të veçanta;

9. Rregullimi me ligj i arsimit plotësues në diasporë;

10. Negocim i kontratës së re kolektive me sindikatat e arsimit dhe palët tjera të interesit;

11. Trajnimet e vazhdueshme falas për të gjithë mësimdhënësit;

12. Çertifikimi dhe akreditimi i instituteve shkencore dhe krijimi i mundësisë për gjenerimin e të hyrave vetanake;

13. Rritje të sigurisë në shkolla;

14. Mbështetje të programeve për arsimin profesional sipas nevojave të tregut.