Gjykata Supreme ka liruar sot nga paraburgimi tri infermieret e përfshira në sulmin fizik ndaj një të moshuare në Pejë, ndërkaq lidhur me këtë ka reaguar sot vajza e të moshuarës, Zhaneta Nura.

Ajo në një postim në Facebook ka shkruar se vendimi për lirimin e të pandehurave nga paraburgimi ditën e sotme nga Gjykata Supreme e Kosovës vetëm sa e ka thelluar plagën.

“Vendimi për lirimin e të pandehurave nga paraburgimi ditën e sotme nga Gjykata Supreme e Kosovës, plagën tonë në zemër vetëm sa e ka thelluar.

Shoku i shkaktuar nga pamjet e dhunës që i ushtrohet nënës time, për ‘Gjykatën Supreme’ paska qenë lehtë i gëlltitshim dhe me këtë veprim kjo gjykatë ‘dhunoi’ për të dytën herë nënën time!”, shkruan Zhaneta.

Gjatë ditës reagoi edhe Meshari Selimaj, avokati i familjes së të moshuarës që u dhunua fizikisht brenda qendrës “Orenda”.

Ai tha se me këtë vendim “nga sot u shua besimi në drejtësi” në lidhje me këtë rast.

Avokati Selimaj, ka thënë se lirimi nga paraburgimi i të pandehurave në këtë fazë, kur akoma nuk ka përfunduar procedura hetimore dhe akoma ekziston rreziku i madh që të ndikohet ne ndryshimin dhe asgjësimin e provave, është tregues i qartë se cilat janë tendencat për trajtimin e mëtutjeshëm të këtij rasti.

“Vendimi i Gjykates Supreme per lirimin nga paraburgimi i te pandehurave ne kete faze te procedures ku akoma nuk ka perfunduar procedura hetimore, dhe akoma ekziston rreziku i madh qe te ndikohet ne ndryshimin dhe asgjesimin e provave, eshte tregues i qarte se cilat jane tendencat per trajtimin e metutjeshem te ketij rasti, relativizimi i tij, dhe ne fund lirimi nga aktakuza apo shqiptimi i ndonje denimi me gjobe.
Me diten e sotme besimi ne drejtesi per kete rast u shua”, ka shkruar Selimaj.

Lirimi i tri infermiereve, reagon avokati i familjes së të moshuarës: Besimi në drejtësi për këtë rast u shua