Kryetari i Komunës së Podujevës, Shpejtim Bulliqi, ka bërë të ditur se më 7 shtator, do të përurohet shtatorja e ish-presidentit të ndjerë, Ibrahim Rugova.

Kjo shtatore sipas Bulliqit është financuar nga buxheti i Komunës së Podujevës.

“Në 34-vjetorin e shpalljes së Kushtetutës së Kaçanikut, të shtunën më 7 shtator, në Podujevë do të bëjmë përurimin e shtatores së ish-Presidentit të Kosovës, Ibrahim Rugova. Kjo shtatore e cila është financuar me buxhetin e Komunës së Podujevës do të vendoset në Parkun e Qytetit, afër ish-objektit të administratës komunale”, ka shkruar ai.

Bulliqi e ka qujatur Rugovën simbol të qëndresës, urtësisë dhe vizionit për një Kosovë të lirë dhe të pavarur.

“Në ceremoninë e përurimit do të marrin pjesë zyrtarë të lartë shtetërorë, bashkëpunëtorë të ish-Presidentit Rugova, familjarë të tij dhe qytetarë nga treva e Llapit e gjitha trevat shqiptare. Ju mirëpresim në ceremoninë solemne, këtë të shtune më 7 shtator, nga ora 13:00”, ka shkruar Bulliqi.