Ministri i Mbrojtjes i Shqipërisë, Pirro Vengu, ka shpalosur detaje nga takimi i sotëm me kryeministrin e vendit, Albin Kurti.

Teksa ka shpërndarë disa fotografi gjatë takimit, ministri shqiptar ka treguar se me Kurtin kanë vendosur theksin në forcimin e bashkëpunimit në rrafshin e mbrojtjes, stabilitetin rajonal dhe ndërveprimin e domosdoshëm me aleatët, për një konsolidim të subjektivitetit ndërkombëtar të Kosovës, raporton Gazeta Online Reporteri.net.

“Sot në Kosovë për të folur për ato ura që na lidhin, e të tjera që duhet të shtojmë në rrugëtimin tonë të përbashkët. Në takimin tejet të hapur e miqësor me Kryeministrin Albin Kurti vendosëm theksin në forcimin e bashkëpunimit në rrafshin e mbrojtjes, stabilitetin rajonal dhe ndërveprimin e domosdoshëm me aleatët tanë për një konsolidim të subjektivitetit ndërkombëtar të Kosovës”, ka shkruar Vengu në Instagram.

Teksa në përfundim, ministri shqiptar ka theksuar se investimet e përbashkëta në mjete dhe kapital njerëzor, janë një kontribut në sigurinë kolektive.

Pas takimit me Kurtin, Ministri i Mbrojtjes i Kosovës, Ejup Maqedonci e ka pritur me ceremoni zyrtare homologun e tij shqiptar, Pirro Vengu.

/Reporteri.net/.