MPJ sqaron pse nuk u kualifikua kandidatja Alketa Spahiu

Ministria kosovare e Punëve të Jashtme ka reaguar ndaj shkrimit të botuar në disa media me titull “Kreu studimet në Evropë, botoi tre libra, por në Kosovë nuk i plotësoi kushtet për punë”. Sipas këtij institucioni, arsyeja pse kjo kandidate nuk u kualifikua për fazën e mëtejshme është mungesa e nostrifikimit të diplomave të saj – ashtu siç parashihet me ligj.


Ministria e Punëve të Jashtme, përmes një reagimi, ka sqaruar se pse kandidatja Alketa Spahiu nuk është kualifikuar në fazat e mëtejshme në një konkurs për diplomatë të shpallur nga ky institucion.

“Kandidatja Alketa Spahiu nuk është përfshirë në listën e ngushtë në konkursin e shpallur nga Ministria e Punëve të Jashtme për zyrtarë të misionit diplomatikë, për shkak se diplomat e  saj të fituara jashtë vendit nuk janë të nostrifikuara nga Ministria e Arsimit – siç parashihet me ligj”, thuhet në reagim.

Në bazë të ligjit, diplomat e fituara jashtë vendit, e te cilat nuk janë të nostrifikuara, nuk janë valide, sqaron MPJ.

“Asnjë kandidat i cili nuk ka plotësuar kriteret e konkursit, nuk është kualifikuar për faza te mëtutjeshme”, thuhet në reagim.

Kandidatja Alketa Spahiu kishte reaguar në rrjetet sociale duke e quajtur të padrejtë faktin se nuk është kualifikuar në fazat tjera të këtij konkursi, edhe pse kishte pëfunduar shkollimin jashtë vendit. /Reporteri.net