Këngëtari Muhamet Sejdiu, i cili tashmë ka dalë pozitiv me Koronavirus, më 13 mars ka kënduar në një aheng ditëlindjeje në Gjilan, aty ku pjesëmarrës ishte edhe i pari i Gjilanit Lutfi Haziri.

I kontaktuar nga Insajderi, kryetari i Gjilanit, ka thënë që nuk ka pasur kontakt me këngëtarin Sejdiu.

“I uroj shërim të shpejt Muhamet Sejdiut, por asnjë kontakt me të nuk e kam pas”, ka thënë Haziri.

Ndërkohë, në këtë aheng, Haziri kishte shkuar bashkë me familje, ndërsa po atë ditë në Kosovë ishin shënuar dy rastet e para me Koronavirus, po ashtu ishin të pranishëm edhe 50 persona të tjerë.

Në të njëjtin aheng ka qenë edhe këngëtari tjetër i njohur nga Gjakova, Shkëlzen Jetishi-Xeni, ka shkruar Reporteri.net.

Këngëtari Muhamet Sejdiu dhe bashkëshortja e tij, janë dy rastet e fundit që dolën pozitiv me Koronavirus. Tashmë ka shkuar në 19-të numri i të prekurve me COVID-19 në Kosovë.

Kujtojmë se më 13 mars Qeveria e Kosovës në një mbledhje të Jashtëzakonshme, mori vendim që të mbyllen të gjitha kafiteritë, restaurantet, klubet e natës, e kështu me radhë.