Organizata për Siguri dhe Bashkëpunim në Evropë (OSBE) ka reaguar në lidhje me shqetësimet enorme publike rreth një lajmi të madh të rremë të dhënë në lajmet qendrore në Radio Televizionin e Kosovës – të marrë nga një media boshnjake për dezinformim – për çka u shprehën se “lavdërojnë” synimin e Bordit të RTK-së për të qartësuar situatën dhe për të kërkuar përgjegjësi redaktoriale.

“Liria e medias dhe integriteti gazetaresk janë gurët e themelit të një shoqërie demokratike. Ne lavdërojmë Bordin e Radio Televizionit të Kosovës për vendimin e tyre të shpejtë për të shqyrtuar një raport të fundit të publikuar më 22 korrik, duke adresuar shqetësimet e mundshme dhe duke sqaruar përgjegjësinë editoriale”, thuhet në reagim.

“Ne u bëjmë thirrje zyrtarëve publikë që të mbështesin mediat në mbajtjen e publikut të informuar dhe për t’i mbajtur institucionet përgjegjëse. Ruajtja e një dialogu të qetë dhe konstruktiv është thelbësor”, ka shkruar OSBE në një reagim.

Bordi i Radio Televizionit të Kosovës ka shprehur dje keqardhje për publikimin e artikullit në faqen online të RTK-së, të përkthyer nga gazeta boshnjake “Slobodna Bosnja”, ku sulmohen dy mediume në vend.

Ushtruesja e detyrës së Drejtoreshës së RTK-së, Zana Spahiu, thuhet se ka informuar bordin që do të formojë një komision profesional “për ta sqaruar situatën në detaje dhe për ta ndriçuar përgjegjësinë editoriale për këtë lëshim dhe do të merr masa rigoroze konform ligjit dhe akteve të brendshme të RTK-së”, shkruan Reporteri.net.

Artikullin që u publikua, Bordi e ka quajtur “kontraverz”.

Bordi i RTK-së për dezinformatën ndaj portaleve: Artikull kontraverz, do të merren masa rigoroze pas sqarimit të situatës