Presidentja e Kosovës, Vjosa Osmani, ka thënë se në Samitin e Bashkimit Evropian ka pasur mbështetje nga shtetet për liberalizimin e vizave. Megjithatë, pas mbledhjes ajo ka thënë se tash kërkohen hapa konkretë për këtë çështje.

Osmani ka thënë se ishin deklaratat më pozitive deri më tani për liberalizimin e vizave, përfshirë edhe vendet që deri më tani kanë qenë skeptike në lidhje me këtë proces.

“Kemi dëgjuar shumë deklarata përkrahëse për Kosovën, për perspektivën evropiane të saj, për liberalizimin e vizave, e treta për rreshtimin e plotë të Kosovës me BE-në sa i përket sanksioneve ndaj Rusisë. Duhet të shkojmë tash nga fjalët në veprime. Na duhen hapa konkretë. Duhet të merret vendimi për liberalizim të vizave. Mendoj se deklaratat duhet të kthehen në veprime konkrete e të votohet në nivel të këshillit të ministrave për liberalizim. Kanë qenë deklarata më pozitive që kemi dëgjuar deri më tash për liberalizim, përfshirë edhe nga shtetet që kanë qenë hezituese”, tha Osmani pas takimit.

E ndërkohë kreu i Presidencës së Bosnjë-Hercegovinës, Shefik Xhaferoviq, ka thënë se u është dhënë mbështetje e plotë shteteve të Ballkanit Perëndimor në rrugën evropiane. Xhaferoviq ka thënë se uron Ukrainën e Moldavinë, dhe mendon se e kanë merituar statusin e kandidatit. Porse, është zhgënjyese pse Bosnja nuk e ka marrë këtë status, pasi ka shtuar se Bosnja ka kaluar në atë që po kalon Ukraina tash.

Përfundon pa rezultate konkrete Samiti BE-Ballkani Perëndimor, anulohet edhe konferenca e paralajmëruar