Pesë parti politike, njëra prej tyre parlamentare, po detyrohen të shtyjnë kuvendet e tyre zgjedhore. Pandemia është arsyeja kryesore që ka bërë që këto parti politike t’i kërkojnë KQZ-së për të lejuar mbajtjen e këtyre kuvendeve në afate të tjera ndryshe nga siç parashihet, shkruan Reporteri.net

Kërkesën për shtyrjen e këtyre Kuvendeve e kanë parashtruar Organizata e Ballit Kombëtar të Kosovës; Balli Kombëtar i Kosovës; Gradanska Iniciatiava Gore; Partia Shqiptare Demokristiane e Kosovës dhe NISMA Socialdemokrate. KQZ, në mbledhjen e së hënës, miratoi kërkesat e këtyre partive politike. Partitë politike, sipas rregullës zgjedhore të KQZ-së për regjistrimin dhe veprimin e partive politike, duhet të mbajnë kuvendin zgjedhor së paku çdo 48 muaj, apo çdo 4 vjet.