Presidentja Osmani s’do ta dekretojë Isufajn kryeprokuror: Është absurde, procesi po kontestohet në gjykata

Presidentja Vjosa Osmani nuk po merret ende me propozimin e Këshillit Prokurial për ta dekretuar Blerim Isufajn si Kryeprokuror të Shtetit. Ky propozim iu dorëzua asaj tash e gjashtë muaj.

Sot, Presidentja tha se e ka njoftuar KPK-në të mos presin dekretim nga ajo.

“Këshilli Prokurorial është i njoftuar dhe atë në takimin e fundit që kemi pasur me ta. Është absurde që të pritet të dekretohet një proces, i cili është duke u kontestuar në gjykatat e Kosovës. Kjo nuk ndodh në një vend ku sundon ligji. E unë jam presidente që e respektoj ligjin dhe kushtetutën”, ka thënë ajo para mediave, pas një ngjarjeje në aksin rrugor tek Aeroporti Ndërkombëtar i Prishtinës.

Shqipdon Fazliu dhe Armend Hamiti më 28 prill dhe 6 qershor respektivisht iu drejtuan Gjykatës Kushtetuese me pretendimin se vendimi i KPK-së për përzgjedhjen e Blerim Isufajt i kishte shkelur të drejtat dhe liritë e tyre të garantuara me Kushtetutë dhe me Konventën Evropiane për të Drejtat e Njeriut.

Shtetet e Bashkuara të Amerikës dhe Bashkimi Europian, në veçanti Gjermania, e kishin konsideruar befasuese, zhgënjyese dhe shqetësuse, mënyrën se si Këshilli Prokurorial e kishte zgjedhur Blerim Isufajn për Kryeprokuror të Shtetit.

Prokurori Shqipdon Fazliu, kandidat për Kryeprokuror të Shtetit ka dorëzuar ankesë në Gjykatën Supreme, lidhur me procesin e përzgjedhjes së Kryeprokurorit të ri të Shtetit.

Këtë e ka konfirmuar për Gazetën Online Reporteri.net, avokati i tij, Flakron Sylejmani.

“Pas pranimit te aktvendimit të gjykatës së shkalles dyte, ne si paditës brenda afatit ligjor në pajtim me ligjin për konflikt administrativ, përmes Gjykatës Themelore në Prishtinë, kemi dorëzuar kërkesën për rishqyrtim të jashtëzakonshëm ndaj aktvendimit të Gjykatës së Apelit, përkatësisht departamenti për çështje administrative për shkak të shkeljes së drejtës materiale dhe për shkak të shkeljes së dispozitave të procedurës”, ka deklaruar Sylejmani për Reporteri.net.

Pretendimet e prokurorit Shqipdon Fazliu, në lidhje me procesin e përzgjedhjes së Blerim Isufajt për Kryeprokuror të Shtetit, nga KPK’ja, muajin e kaluar i kishte hedhur poshtë Gjykata e Apelit.

Apeli e ka refuzuar refuzuar si të pabazuar ankesën e prokurorit dhe kandidatit për Kryeprokuror, Shqipdon Fazliu dhe ka vërtetuar vendimin e Gjykatës Themelore në Prishtinë, Departamenti për Çështje Administrative, e cila e kishte hudhur poshtë padinë si të paraqitur pas kalimit të afatit.

Shqipdon Fazliu bashkë me kandidatin tjetër për kryeprokuror Armend Hamitin, për të njëjtin rast ishin ankuar edhe në Gjykatë Kushtetuese, por Kushtetuesja në korrik të këtij viti e kishte shpallë të papranueshme kërkesën e tyre, pasi kishte vlerësuar se parashtruesit e kërkesave nuk i kanë shterur të gjitha mjetet juridike.

KPK-ja më 6 prill 2022 kishte votuar në mënyrë unanime Blerim Isufajn për Kryeprokuror të ri të Shtetit. Nga ajo kohë, institucioni i Kryeprokurorit të Shtetit funksionon me ushtrues detyre, pasi Presidentja e vendit ende nuk e ka dekretuar shefin e ri të Prokurorisë së Shtetit.