Prokuroria Speciale e Republikës së Kosovës ka nisur hetime lidhur me tenderin gati tre milionë euro, njëburimor të Qeverisë Kurti për ndërtimin e dy urave mbi lumin Ibër në Mitrovicë, i cili nisi në fillim të korrikut.

Në një njoftim për media, Prokuroria bëri të ditur se ka autorizuar Policinë e Kosovës që të ndërmarrë veprimet e nevojshme hetimore, me qëllim të zbardhjes së plotë të gjendjes faktike dhe dyshimeve të ngritura në këtë rast.

“Prokuroria Speciale ka autorizuar Policinë e Kosovës të ndërmarrë veprimet e nevojshme hetimore me qëllim të konstatimit të drejtë të gjendjes faktike për të gjitha dyshimet lidhur me rastin, në përputhje me Kodin e Procedurës Penale. Hetimi për kontratën për ndërtimin e urave në Mitrovicë, nuk ka të bëjë me ndonjë kundërshtim ndaj projektit në fjalë, por me përmbushjen e obligimeve ligjore, në mbrojtje të interesit publik dhe sundimit të ligjit, në mënyrë që të garantohet një administrim i drejtë dhe ligjor i resurseve publike.”, thuhet në njoftim.

Prokuroria gjithashtu ka sqaruar se nuk është në kompetencën e saj të vlerësojë apo miratojë projekte infrastrukturore, por theksoi se detyra e saj është të veprojë sipas ligjeve në fuqi kur ekzistojnë dyshime për keqpërdorim të fondeve publike.

PS-ja, ka njoftuar se nëpërmjet pesë prokurorëve të angazhuar, i ka aktualisht në trajtim afër 2 mijë kontrata një burimore.

Njoftimi i plotë:

Prokuroria Speciale njofton opinionin publik se nuk e ka në kompentencë të vlerësojë apo të aprovojë ndonjë projekt infrastrukturor, por theksojmë se roli i PS-së është të veprojë bazuar në ligjet në fuqi, në rastet kur ekzistojnë dyshime për keqpërdorim të fondeve publike. PS-ja, nëpërmjet pesë prokurorëve të angazhuar, i ka aktualisht në trajtim afër 2 mijë kontrata një burimore.

Bazuar në këtë, Prokuroria Speciale ka autorizuar Policinë e Kosovës të ndërmarrë veprimet e nevojshme hetimore me qëllim të konstatimit të drejtë të gjendjes faktike për të gjitha dyshimet lidhur me rastin, në përputhje me Kodin e Procedurës Penale.

Hetimi për kontratën për ndërtimin e urave në Mitrovicë, nuk ka të bëjë me ndonjë kundërshtim ndaj projektit në fjalë, por me përmbushjen e obligimeve ligjore, në mbrojtje të interesit publik dhe sundimit të ligjit, në mënyrë që të garantohet një administrim i drejtë dhe ligjor i resurseve publike.

Ndërtimi i dy urave mbi Ibër do të kushtojë rreth 3 milionë Euro, Qeveria Kurti e negocioi tenderin