Bashkimi Evropian ende nuk ka një datë të saktë për rundin e ri të dialogut mes Kosovës dhe Serbisë, ka bërë të ditur zëdhënësi, Peter Stano, raporton Gazeta Online Reporteri.net.

Në një konferencë për media, Stano ka thënë se qëllimi i BE-së është që sa më parë të ketë takim në nivel kryenegociatorësh, sepse sipas tij ka një varg çështjesh për të diskutuar.

“Ne gjithmonë i shpallim takimet sipas rastit. Thjesht kujtoj se takimet në nivelin e kryenegociatorëve nuk janë një ngjarje realisht mediatike, ndaj nuk po i shpallim në mënyrë proaktive, por nuk mund të vijnë nga asnjë datë. Në këtë fazë, sigurisht, synimi ynë është që të kemi takimin e kryenegociatorëve sapo të bëhet. Ka shumë çështje në tavolinë që duhet të zgjidhen”, ka thënë ai.

Zëdhënësi i BE-së ka folur edhe për veprimet e fundit në veri të vendit, ku Qeveria e Kosovës ka mbyllur pesë institucione paralele serbe javën e kaluar.

Stano ka përsëritur qëndrimin e bllokut evropian, duke thënë se këto veprime janë të njëanshme dhe të pakoordinuara, me potencial të rritjes së tensioneve.

“Ne e konsiderojmë këtë si një hap shumë të padobishëm, një tjetër hap të njëanshëm të pakoordinuar që ka kapacitetin të rris tensionet dhe të çojë në përshkallëzim të mëtejshëm në situata tashmë të paqëndrueshme në terren. Dhe Bashkimi Evropian, çfarë do të bëjmë? Sigurisht që ne po e përcjellim qëndrimin dhe shqetësimin tonë me këtë sekuencë të pakoordinuar”, ka thënë ai.

Kritika për veprimet e Qeverisë pati edhe nga Shtetet e Bashkuara të Amerikës, Franca, Gjermania e Mbretëria e Bashkuar.

Në anën tjetër, Qeveria e Kosovës ka thënë se institucionet e mbyllura në komunat e banuara me shumicë serbe në veri të vendit, punonin nën udhëheqjen e Serbisë duke cenuar kushtetutshmërinë dhe ligjet e Republikës së Kosovës.