Qeveria e Kosovës është deklaruar për takimin që sot gjatë ditës kryeministri i Kosovës, Albin Kurti kishte me kreun e AAK-së, Ramush Haradinaj, i cili ishte i vetmi lider opozitar që iu përgjigj ftesës së tij për takim.
Qeveria e ka cilësuar përmbajtësor takimin me Haradinajn, shkruan Gazeta Online Reporteri.net.
Qeveria njofton se në takim u diskutua për “idetë, modelet dhe opsionet për elementet kryesore të marrëveshjes ndërmjet Kosovës dhe Serbisë të cilat po qarkullojnë nga e nëpër kancelaritë perëndimore e demokratike, e që në këtë periudhë Qeveria thotë se funksionojnë si sprova dhe testime.
“Në këtë takim përmbajtësor në të cilin Kryeministri Kurti ishte i shoqëruar nga zëvendës-kryeministri i parë, Besnik Bislimi, u diskutua për procesin e dialogut, idetë, modelet dhe opsionet për elementet kryesore të marrëveshjes ndërmjet Kosovës dhe Serbisë të cilat po qarkullojnë nga e nëpër kancelaritë perëndimore e demokratike, e që në këtë periudhë funksionojnë si sprova dhe testime”, thuhet në njoftimin e Qeverisë.
Edhe kreu i Aleancës për Ardhmërinë e Kosovës, Ramush Haradinaj, është deklaruar pas takimit që zhvilloi me Kurtin, temë e të cilit Haradinaj tha se ishte marrëveshja finale me Serbinë, e fokusuar në njohje reciproke
“Sapo e përfundum një takim me kryeministrin Kurti. Tema ishte marrëveshja finale me Serbinë, pra marrëveshja për njohje reciproke. E diskutuam procesin, e diskutuam marrëveshjen vetë, i diskutuam sfidat që i ka Kosova në këtë proces, pra ishte një takim me përmbajtje”, tha Haradinaj pas takimit. /Reporteri.net