Prokuroria e Durrësit ka ndryshuar akuzën për Hygerta Metën, e cila akuzohet se së bashku me vëllanë e saj të madh ka vrarë dhe asgjësuar kufomën e babait të saj, Pëllumb Meta, ngjarje e ndodhur më 10 shkurt 2024 në Shën Vlash të Durrësit.

Teksa pritet të nisë sot procesi gjyqësor në ngarkim të tre fëmijëve: Hygerta Meta, Hysen dhe Amarildo Meta, organi i akuzës bën me dije se për 19-vjeçaren ka ndryshuar akuza nga: “Fshehja dhe asgjësimi i kufomës”, në “Vrasje për shkak të marrëdhënieve familjare”, duke rënduar kështu pozitën procedurale të shtetases Hygerta Meta duke e dërguar në gjykim me një akuzë të re për vrasje në bashkëpunim me vëllanë e saj Hysen Meta “Vrasje për shkak të marrëdhënieve familjare.

Kujtojme që Hygerta Meta ka ndryshuar disa herë version, ku disa herë e ka marrë përsipër vrasjen dhe disa herë e ka përjashtuar veten nga përfshirja në ekzekutimin e babait të saj por vetëm në fshehjen e asgjësimin e kufomës.

Krimi u zbulua më 23 shkurt, kur policia gjeti trupin e 49-vjeçarit, pellumb meta. Ai ishte shpallur i zhdukur prej 13 shkurtit, pas denoncimit të djalit të madh se kishte humbur kontaktet me babanë.

Por ajo që u denoncua si zhdukje ishte në fakt një vrasje. Policia zbuloi se Pëllumb Meta ishte vrarë më 10 shkurt dhe trupi ishte fshehur në kasollen e bagëtive. /vizionplus