Presidenti i Kosovës, Hashim Thaçi do të zhvillojë takim të veçantë me Presidentin e Francës, Emmanuel Macron, para darkës së paraparë të mbahet në kuadër të nisjes së Forumit të Paqes.

Bëhet e ditur se në këtë takim do të diskutohet për perspektivën europiane të Kosovës.

Siç bëjnë të ditur nga Zyra e Presidencës së Kosovës, në takimin mes Thaçit e Macron, do të bisedohet ”me theks të veçantë nevoja për një vendim të menjëhershëm dhe meritor për liberalizimin e vizave për qytetarët e Kosovës”.

Veç kësaj Presidenti Thaçi nesër do të flasë në një panel të veçantë për sukseset dhe sfidat e ndërtimit të paqes së qëndrueshme në Kosovë.

Forumi i Paqes i Parisit është mbajtur për herë të parë vitin e kaluar, në 100 vjetorin e armëpushimit që solli fundin e Luftës së Parë Botërore.

Në darkën e shtruar nga Presidenti i Francës, Emmanuel Macron, pritet të marrë pjesë edhe Presidenti i Serbisë, Aleksandar Vuçiq.