Teoria e Haki Abazit: Thaçi sërish President, Kadri Veseli Kryeministër

Zëvendëskryeministri në detyrë Haki Abazi thotë se rrëzimi i qeverisë së udhëhequr nga Albin Kurti ishte pjesë e një marrëveshje të fshehtë në mes të presidentit Hashim Thaçi dhe kryetarit të LDK’së, Isa Mustafa.


Madje, sipas Abazit, edhe deputetët e LDK’së nuk janë të informuar për një skenar të tillë. Thotë se pjesë e marrëveshjes është që LDK ta bëjë sërish Thaçin president vitin e ardhshëm.

“Për çdo ditë po zbulohet skenari në mes të Thaçit dhe Mustafës për rrëzimin e qeverisë Kurti. Lidershipi i LDK’së ka kushtëzuar edhe atëherë deputetët që të votojnë Thaçin president”, kujtoi Abazi kohën kur Thaçi u zgjodh president.

Haki Abazi thotë se Thaci do të kërkojë të rizgjedhet president në vitin 2021 dhe Kadri Veseli mund të pretendojë postin e kryeministrit. Ai than ë T7 se këtë skenar nuk e dinë deputetët e LDK-së, prandaj e kanë votuar rrëzimin e qeverisë Kurti.

“Në momentin kur Thaci kërkoi gjendjen e jashtëzakonshme kur kishim 19 të infektuar dhe asnjë të vdekur dhe u përkrah nga Mustafa, Hoti e Veliu, është parë që kishte një marrëveshje. Të gjitha përpjekjet janë bërë që të mos lejohet realizimi i koalicionit VV-LDK. Votat e fundit LDK i ka marrë pikërisht për shkak të një marrëveshje gjentilmene që të luftohet krimi dhe korruspioni. Thaci në kompensim do të kërkojë votat për President në vitin 2021. Shkon edhe më tutje, po ashtu sic ndodhi para demarkacionit, sic u zgjodh president me votat e LDK-së, e njëjta do të ndodhë edhe tani, nëse Gjykata Kushtetuese nuk parandalon një skenar të shembjes së demokracisë. Faza tjetër do të shkonte sipas logjikës së kontrabandimit që prapë të rrëzohej ajo qeveri dhe një koalicion tjetër të vinte në shprehje në zgjedhjet e ardhshme. Mosvotimi nga PDK është lojë e njëjtë që të mos shihet afërsia sepse një numër i madh i deputetëve të LDK-së nuk do të pranonin as rrxuarjen që më pas të votohej Thaci president dhe pas kësaj të vie faza tjetër e rrëzimit të qeverisë ku Kadri Veseli do të pretendonte të bëhej kryeministër nga një kombinatorikë tjetër në zgjedhjet e ardhshme”, ka thënë Abazi.